VOV4.M’nông: Ta rơh rƀŭn geh tâm lơ 15/7, Ntoh măt N’gâng kan dak si Lào mbơh, rnoh nŭih ntưp srê Covid-19 bah Lào tâm 24h rlau aơ lah 116 nŭih ndrel geh tay du hê nŭih khĭt. N’gâng kan dak si Lào nkah đă ƀon lan ân geh njrăng đah srê ngăn lah ntil kman mhe Delta. Geh ăp nŭih bol ma chuh 2 nglai vắc xin yơn lah hôm ntưp kơt lah du hê nŭih kan tâm Ngân hàng ta Thủ đô Vientiane. Rnoh nŭih ntưp srê Covid-19 bah Lào tâm âk nar rlau aơ hao âk, tâm nê ngăn lah nŭih pah kan lăp tâm Lào. Tĭng nau kơp geh tât 15% nŭih pah kan Lào sĭt dak Thái Lan geh ntưp srê Covid-19. Rnôk aơ geh nklăp 100 rbăn nŭih kan bah Lào dôl kol ta Thái Lan, âk nŭih mô geh kan pah ndrel ŭch sĭt. Bah năp nau geh bah srê ji nar ma jêr, Chính phủ Lào hŏ rgum vắc xin gay ma ndal chuh ân nŭih ƀon lan, nsôih tât lôch năm aơ chuh ân 50% rnoh nŭih./.

Nŭih rblang: H’Thi