VOV4.M’nông: Nô nău lơh n'hang bri ta Dak Lak dôl tât duh hô. Ntơm bah bôk năm tât aƀaơ ta Dak Lak hŏ geh tât 650 tơ̆ lơh n'hang bri, rŭn in neh bri, âk bơi du n'gul rnoh tơ̆ nău tih luật mât njrăng bri tâm lam dak. Nô nău lơh n'hang bri, rŭn in neh ta Dak Lak dôl dŭt mbơh njrăng lor, âk ntŭk duh hô lơh n'hang bri ntoch jong yơn nkra rmal mô hŏ bah lĕ.  

Âk tiểu khu mpeh n'har bri mât Công ty TNHH MTV Lâm nghiệp Krông Bông (nkuâl Krông Bông, n'gor Dak Lak), bri hŏ geh lơh n'hang. Hvi tât dŭt măt uănh lah ăp dor yôk tâm ntêng lêng nsum hŏ geh chôk lưn lĕ bah jâng yôk tât bôk yôk. Hăn tĭng ăp trong jâng lăp tâm bri, chôt nkêng nkăng ăp mir ruih mhe geh kăl chôt, lơh su, âk tơm si têh, jê̆ geh kăl chôt, njok rkăng. Âk n'gu tơm si mhe geh kăl chôt, trong rvoal têh tât bar hê nuĭh ut. Wa Bùi Văn Hưng, Groi Giám đốc Công ty Lâm nghiệp Krông Bông dơn ngăn đŏng:

         “Ngăn pah kan mât njrăng bri nar lơn ma jêr. Lơn lah Công ty Lâm nghiệp Krông Bông kâng n'har đah nkuâl Ea Kar n'hanh M’Đrăk, dôl gŭ nklang ntŭk bah nuĭh H’Mông gŭ rêh đah   nklăp 11.000 nuĭh. Nkre, tâm rnoh hvi neh mât njrăng bah công ty tâm păch rlŭ đah âk neh mpeh mât uănh bah UBND ăp xã. Jêng tât nău mât uănh nuĭh ntŭng lăp hôch lơh n'hang bri lah dŭt jêr jŏt."

          Prao khay bôk năm, ta Dak Lak geh 650 tơ̆ lơh n'hang bri, rŭn in neh mô geh nău way ri êng ta Công ty Lâm nghiệp Krông Bông hŏ geh 425 tơ̆ lơh khuch khat nklăp 108ha, âk bơi 3/4 rnoh tơ̆ nău tih tâm lam n'gor. Tĭng wa Trần Văn Tùng, Hạt trưởng Hạt Kiểm lâm nkuâl Krông Bông, bri ta Công ty Lâm nghiệp Krông Bông geh lơh n'hang, ntoch jong mbro nău tih lor bôk năp lah tă bah nuĭh tơm bri:

         “Nô nău lơh n'hang bri ntoch jong kơt aơ lah tă bah nuĭh tơm bri mƀơk lhoi mât njrăng. Công ty lâm nghiệp Krông Bông dơi jao an neh bri dŭt têh hvi yơn mpôl kan way mât njrăng bri hôm dŭt rbăn lhơ, ntop đah du ntŭk nê nơh geh mƀơk lhoi mât njrăng, ntơm bah nê ta n'har neh bri công ty mât njrăng hôm geh mbro ăp tơ̆ lơh n'hang bri, lơh joi si, tăch rvăt si way geh mbro, n'hanh ngăch đăng.” 

Ndrel đah Krông Bông, nô nău lơh n'hang bri, rŭn in neh bri dôl geh krit hô ta ăp nkuâl kơt Ea Súp, Cư M’gar n'hanh Ea H’leo đŏng. Wa Nguyễn Văn Quyến, Groi  tổng giám đốc Công ty TNHH nkret njêng ndơ sa n'hanh si gle Dak Lak, an gĭt đơn vị dơi jao mât rlău 27.000ha bri n'hanh neh bri ta nkuâl Ea Súp. Nô nău lơh n'hang bri, rŭn in neh ta n'har mât công ty dŭt đăng ndâp. Ntơm bah năm 2017 tât aƀaơ, geh nklăp 400ha bri n'hanh neh bri bah công ty geh lơh n'hang, rŭn in hŏ dơi nchih si ƀŭt. Yơn lah, geh dŭt đêt nău tih dơi ôp uănh, nkra rmal n'hanh rmal mô hŏ bah lĕ lah nkô̆ ƀư nuĭh ntŭng lơh bri dah rŏng lơh hăn:

        “Ăp nuĭh lơh n'hang bri n'hanh rŭn  in neh dŭt đăng ngăn, rtil săk, mbra plơng lơh tay ăp mpôl kan mât njrăng bri bah  công ty. Ăp tơ̆ nkri lơh, ntêt n'hanh lơh ndjơh drăp ndơ, ăp ntŭk gŭ kâp njrăng bri bah công ty ri hŏ njuăl si ƀŭt tât ăp nhih pah kan dơi kan, yơn tât aƀaơ hôm mô hŏ dơi rmal ơm. Lơn lah ăp rơh rŭn in neh ƀư jay, nkưp chuanh tâm neh bri công ty hôm geh âk đŏng.”

          Tâm rnôk nê , wa Ngô Văn Thắng, Groi kruanh UBND nkuâl Ea Súp an lah, nô nău lơh n'hang bri ta nkuâl hôm tât duh hô geh nkô̆ têh bah nău mƀơk lhoi mât njrăng, mô jăp dơn kan bah nuĭh tơm bri n'hanh lĕ ma ăp nhih pah kan dơi kan, lơn lah hvi neh bri hŏ jao an ăp doanh nghiệp:

         “Ngăn ta nkuâl nău nking nchăng, nău rmal nuĭh lơh bri, nkra neh geh rŭn in mô geh nău way mâp âk jêr jŏt. Hôm geh mpơl mƀơk lhoi pah kan mât uănh, njrăng mât bri. Âk doanh nghiệp mô dơi njêng mpôl way rnâng kan mât njrăng bri, mô lah lah geh ri mpôl kan dơi kan mô tŏng dăng gay ƀư pah kan hăn mât njrăng bri ơm".

          Hŏ 7 năm Chính phủ rđău đă ntĭl mpông bri n'hanh tĭng ƀư ăp trong nkra jăch ndăn mpeh mât njrăng bri. Yơn lah, nău ngăn geh ta Dak Lak an saơ, ăp trong nkra mât njrăng bri nha mô hŏ geh nău tam ơm, lơh n'hang bri, rŭn in neh bri hôm tât geh lêng lang. Nău ngăn geh dja, dôl geh nău mƀơk lhoi mât uănh bah âk nuĭh tơm bri n'hanh âk jăch ndăn, âk n'gâng kan. Tâm rnôk nê, nău rmal nuĭh mô jăp dơn kan mô hŏ lhăt ơm, rmal nuĭh tih mô hŏ bah lĕ, jêng tât âk ntŭk jêng duh hô lơh n'hang bri. Nô nău dja ntoch jong tâm âk năm ƀư an nău rmal ăp nău tih tâm mât, njrăng bri nar lơn ma jêr  jŏt, ân geh nău lăp kan âk gưl, âk n'gâng kan đah nău ƀư lĕ n'hâm suan, bah lĕ mơ dơi nking nchăng nău lơh n'hang bri./.

Nuĭh rblang: Điểu Thân