VOV4.M’nông: Geh nau dơi ntơm lơ 2-5/8/1964 lah nau rhơn ngăn bah ăp kơn cán bộ, tahen Quân chủng Hải quân. Lah rmôt kan râng tâm nau dơi rơh bôk năp bah rnôk aơ 57 năm, ăp rơh cán bộ tahen Lữ đoàn 170 nkuăl 1 tahen dak lêng hŏ rlet nau jêr, nau khuch, tâm rnglăp ndâk njêng rmôt kan mô rlu têh dăng jêng rmôt kan tơm gay ma mât nkuăl dak lêng mpeh ba lơ bah neh dak.

Ăp nar ma aơ, bol ma bri mih, nar ndrel nau khuch bah srê Covid-19, cán bộ, tahen rmôt 135, Lữ đoàn 170 hôm nsôih ntĭm nti gay ma ma nâp. Gŭ kan tâm n’gor Quảng Ninh, Lữ đoàn 170 nkre ƀư nau kan njrăng, rdâng srê, nkre mât rmôt kan, ndoh ndơ tâm lơh. 100% cán bộ, tahen bah Lữ đoàn hôm ƀư ân rjăp nau kan njrăng, rdâng, ngăn lah nau ntrŭnh “5K” bah N’gâng kan dak si. Êp nau nchrăp dak si, mpuh nkhĭt kman, put bok put mbung ndrel veh săk ƀa ƀơ, phung hên rđau ăp rmôt kan gay mât đăp mpăn srang ƀah rnôk ntĭm nti. Ntơm bah quân cảng aơ, âk duk bah Lữ đoàn 170 ntơm hăn, ƀư nau geh dơi ăp nau kan geh jao. Kơt tĭng ăp nau ueh ơm bah ăp kơn mbơ, nô hăn lor, ăp cán bộ, tahen bah lữ đoàn nar aơ mô rlu chiăr nti, n’hao nau dăng chính trị, lŏ ntrŭt dăng nau ntĭm nti gay n’hao nau dơi, nau kan ndrel mra tâm lơh. “Rhơn, ntô̆ n’hao lah cán bộ, tahen bah rmôt kan lơh dăng bôk năp” nê lah nau mĭn bah ăp cán bộ, tahen Hải đội 135, lữ đoàn 170.

Thượng uý Trần Văn Cảnh, Kruanh ntŭk kan hoả lực tàu 354, hải đội 135 mbơh: Ăp nau ntĭm nti, ăp nau vay ueh ơm bah mbơ nô lah ăp nau nkoch ntĭm tâm ăp nar rƀŭn bah duk gay ma nkah tât ăp cán bộ, tahen mro n’hao nau blau, n’hâm tâm lơh gay jêh nau kan geh jao tâm ăp kơn:

‘Lah rơh kơn mom geh rêh tâm nau đăp mpăn ndrel ndơn geh ăp nau dơi bah ăp nau roh hoach, n’hâm tâm lơh bah ăp gơn Mbơ, nô ngăn lor, ngăn lah geh pah kan tâm rmôt kan geh duk tâm lơh tơm lah nau tâm lơh geh nau dơi rơh bôk năp bah tahen dak lêng Việt Nam, săk gâp mro daơ rhơn ndrel saơ kloh ngăn nau kan bah nơm”.

Thiếu tá Phạm Tố Chinh, chính trị viên Hải đội 135 mbơh: ăp tă geh blau bah ăp rơh tâm lơh bôk năp lơ 2 ndrel 5/8/1964 hŏ bonh đă, njêng nau rnơm ndrel ndơn nau roh hoach gay ma mât dak lêng, gôl dak bah neh dak:

‘Gay ƀư kơt tĭng nau blau kŏ kơt lah nau dăng bah ăp cán bộ tahen ê lor lah nau ntĭm mbơh mpeh nau mĭn, gĭt kloh mpeh nau kan, ăp nau jêr tâm rnôk ƀư nau kan, ta ưbah nê năl nau kan tơm geh jao, pơk trong nơih mpeh nau ntĭm nti ueh ngăn gay ăp đồng chí ƀư ân ueh nau dơi, nau blau mĭn nsôih êng, ntĭm nti ndrel ngăn lah ntĭm mbơh tâm rnôk ntĭm nti, mrta tâm lơh kŏ kơt lah kơt tĭng tâm rmôt kan, tâm pa ưmbơh nau blau bah ăp kơn nô, mbơ hăn lor kơt tĭng nuih n’hâm kan bah nơm”.

Ăp năm êp aơ, tâm biên chế bah rmôt kan 135 geh tay âk duk mpan đah ăp ntil ndơ nchrăp dŏng ueh mhe. Tâm dăch ma nau ntĭm nti, mra tâm lơh ndrel mât ndoh ndơ kan, lah nau kan ƀa ƀơ bah rđau kan, rđau đă bah ăp gưl kan Lữ đoàn 170, gay rƀŏng tât nkô̆ nau prêh ngăn: nŭih ndrel ndơ dŏng nchrăp nau kan mro ƀư ân jêh nau kan geh jao. Thượng tá Tô Hồng Quân, Chính uỷ Lữ đoàn 170, vùng 1 tahen dak lêng nkoch: Cán bộ tahen lữ đoàn 170 janh dăng mrô leo tâm nơm nau nâp nâp mpeh nau mât neh dak:

‘Ntĭm nti, pah kan tâm rmôy kan geh nau dơi ueh tahen kŏ geh ntô̆ n’hao, lữ đoàn kŏ ntrŭt dăng nau kan ân tahen dŏng ân blau ngăn ăp ntil ndơ dŏng, ntô̆ n’hao nuih n’hâm rlet ăp nau jêr, ndâk njêng nau nâp mpeh chính trị nâp nâl”.

Ntơm bah nau dơi bôk năp kăl e, ăp rơh kơn cán bộ tahen nar aơ hŏ geh ‘ntop tay n’hâm”, n’hao tay nau dăng gay ma ndâk tay du lữ đoàn 170 nâp nâl, tâm di ngăn lah rmôt kan janh dăng tâm tahen ƀon lan tâm mpông bôk năp bah dak lêng mpeh ba lơ bah neh dak./.

Nŭih rblang: H’Thi