VOV4.M’nông: Ôi lơ 2/7, ta Hà Nội, geh rơh rƀŭn trực tuyến lam dak lôch nau kan nội vụ 6 khay bôk năm ndrel ntrŭnh nau kan 6 khay dŭt năm ntŭk kan nội vụ. Kruanh n’gâng kan nội vụ Phạm Thị Thanh Trà ƀư tơm nar rƀŭn. 6 khay rlau aơ, ntŭk kan nội vụ hŏ nchrăp kơl nchră, rgop nau ueh tâm nau dơi bah săch kan ntoh măt Quốc hội gưl 15 ndrel ntoh măt HĐND ăp gưl năm kan 2021-2026, mô rlu rgâl mhe nkô̆ nau, nau rđau kan, mât ntŭk kan, mât tâm dăch nuih n’hâm ntrŭnh bah Đại hội 13 bah Đảng ndrel Đại hội ăp đảng bộ tâm dâng. Tâm rơh rƀŭn, ntoh măt Sở nội vụ ăp n’gor, nkuăl ƀon têh tâm nchră tât ăp nau jêr. Nau ê dơi tâm nau ntrŭnh ăp nau bah Chính phủ mpeh ntŭk pah kan, biên chế công chức, rnoh nŭih pah kan, dăp rgum ntrong kan hành chính bah ntŭk kan ndâk njêng nsum…Ăp ntoh măt đă, Bộ nội vụ ân geh nau ntrŭnh ntĭm ân kloh lơn gay ăp nkuăl, ntŭk kan ntrŭnh.

            Ntoh nau ta nar rƀŭn, Kruanh n’gâng kan Nội vụ Phạm Thị Thanh Trà đă: ăp khay dŭt năm, Sở nội vụ ăp n’gor, nkuăl ƀon têh ân mât ân dăch nuih n’hâm ntrŭnh Đại hội 13 bah Đảng, bah Bộ nội vụ, ăp nkuăl gay rgâl mhe nkô̆ nau, nau kan leo dŏng ƀư, djăt tâm dâng, vay tâm nchră nau đah Bộ nội vụ gay geh trong rklaih./.

Nŭih rblang: H’Thi