VOV4.M’nông: Mih têh jŏ jong tâm âk nar rlau aơ ƀư âk nkuăl tâm n’gor Lâm Đồng dôl ma geh lip băm jru tâm dak. Tâm xã Hiệp An, nkuăl Đức Trọng, mih têh jŏ jong, rnoh dak ta ưbah tu hoch sĭt âk ƀư âk thôn Định An, K’Rèn, K’Long ndrel Tân An geh dak lip băm. Yor rnoh dak hao prêh ntơm du mét tât du met ma n’gul ri ma âk neh tăm byăp kao bah ƀon lan tâm nkuăl geh dak lip băm. Mô êng tâm xã Hiện An, moh têh jŏ jong kŏ ƀư dak me Cam Ly hao têh ndrel lip băm tâm xã Hiệp Thạnh, nkuăl Đức Trọng ndrel du dê̆ ntŭk tâm nkuăl Lâm Hà.

Bah năp nau tât jêr bah mih nar, ntŭk kan Rnâng kan rđau nau kan bah Trung ương mpeh nau njrăng rdâng trôk nar mih sial geh nau mbơh njơl ăp Rnâng kan nau rđau njrăng rdâng trôk nar lơh ndrel joi kơl nŭih rmanh tâm n’gor Lâm Đồng mpeh nau rdâng đah dak lip nkuăl lah tâm dak me Cam Ly, ntrŭnh nau ntrơn leo ân ƀon lan luh bah nkuăl geh dak lip jru gay ma tât ntŭk gŭ đăp mpăn./.

Nŭih rblang: H’Thi