VOV4.M’nông - Nu nău n’glău bât djơh, jur khuch n’hanh tih ndring mpêr ƀư mô đăp mpăn n’glău bât ta Dak Lak dôl mbơh njrăng. Âk nău tih hô lĕ geh âk năm yơn mô dơi mkra, lơ ƀư hao klach tâm yan mih phŭt sial, ntêt nkri ăp nkual tuch tăm n’hanh ƀon lan gŭ ta nkual bah dâng.

                   Jêh du đêt rơh mih bôk yan, rnoh dak tâm n’glău bât Ea Tul 1, xă Băng Adrênh, nkuăl Krông Ana, n’gor Dak Lak lĕ êp tât bâr rbông bât. 350 rbăn mét khối dak mpeh bah lơ jêng nău rvê bah âk rnăk ƀon lan rêh wăr aơ yor rbông bât nchăng dak dôl tâm nău geh roh đăp mpăn. Lơ rvê lơn, rnôk 2 n’glău dak, dơi kuih bah dâng jâng bât. Du hê nuĭh ƀon lan rêh ta êp dak bât an gĭt, tâm nău mih têh jŏ jong âk nar, jâng bât lĕ geh âk dak mŭr, 2 n’glău aơ mbra ƀư an n’glău bât geh pĭch rlâm, jêng play bom dak, ƀư nkri an nkual bah dâng.

         “Ao nĕ nuĭh an neh gay tŭng n’glău bah dâng jâng bât nĕ, nkô̆ nău bah luật Neh ntu, đê điều mô an nău aơ. Nuĭh pă neh, nuĭh ƀư tih pháp luật ri an trok bah năp pháp luật. Yor nău aơ dŭt klach an nuĭh ƀon lan, rnoh neh dŭt âk, play bom dak aơ mô geh moh rnôk pơng mbra mpling”.

                   Wa Nguyễn Đức Phú, Kruanh Chi nhánh nkuăl Krông Ana-Công ty TNHH MTV mât uănh dak bât Dak Lak an gĭt, ntŭk kan mât uănh 14 n’glău n’gâr dak n’hanh du dak bât n’gâr hao, tâm nĕ geh n’glău bât Ea Tul 1. Nău ntŭng n’glău ka bah đang jâng dak bât lĕ dơi ntŭk kan saơ n’hanh mbơh an n’gâng kan ƀon lan. Yơn lah, nău tih aơ hôm e tâm rnôk ndơ ƀư dôl mô đăp mpăn. Wa Phú an gĭt, nu nău tih jêng tât mô đăp mpăn n’glău bât ta lam nkuăl lah dŭt âk, n’hanh nău mkra mô lôch dôl ƀư rnoh nău tih nar lơ hao:

Nău ƀư dak bât ta Dak Lak lĕ khuch, jŭr djơh n’hanh roh đăp mpăn

                   “Mpôl hên lĕ dăn đă âk hôm, kơt lĕ rngôch ăp n’glău bât ta lam nkuăl, yơn nău nking n’gang bah n’gâng kan ƀon lan mô dơi mkra rjăp. Geh ăp nu nău mpôl hên mbơh lĕ jŏ, đê̆ đŏng mbơh 2-3 tơ̆ yơn mô saơ mplơ̆ tay nu nău ơm. Yor nău mô rjăp, mô dơi mplơ̆ nu nău ơm ndơ ƀư ri ƀư an nuĭh ƀon lan mô njrăng, rnăk aơ ƀư ri rnăk êng ƀư. Mô rmal ri khân pơng ƀư tay, nuĭh aơ tât nuĭh êng”.

         Lam hvi ta n’gor Dak Lak, nu nău n’glău bât jŭr djơh, tih ndring mpêr đăp mpăn geh âk đŏng. Wa Trịnh Quốc Bảo, Kruanh jrô kan mât uănh dak bât n’hanh cơ điện, Công ty TNHH MTV mât uănh ndơ dak bât Dak Lak an gĭt, tâm âk nău tih, rŭn in ma ntŭk kan saơ, geh âk nuĭh lĕ dơi n’gâng kan ƀon lan an sam ƀŭt kơp dơn dŏng neh. N’hanh kơt tâm ban ăp moh nău lĕ geh ta nkuăl Krông Ana, nău rmal mbrơi ăp nău tih rŭn in ndring mpêr n’gar dak bât, lơ ƀư ăp dak bât hô tay mô đăp mpăn.

                   “Aƀaơ nu nău rŭn in ndring mpêr n’gar mât njrăng dak bât hôm e geh dŭt jêr jŏt, đah âk trong ƀư. Êng lah geh ăp dak bât n’gâng kan ƀon lan lĕ an sam ƀŭt kơp dơn dŏng neh ta nkual dak bât, kơt pă tâm klŭng dak bât mô lah pă sŏng tâm n’glău bât, mô lah êp jâng bât. Nău nĕ tih ăp nău ntrŭnh bah Luât dak bât, n’hanh ăp nău ntrŭnh êng geh tât. Ŭch nkra rgâl, n’hao tay mô lah ntêm dak ri nuĭh ƀon lan nking n’gang, geh nău tâm pit. Yor nê, dăn đă ăp ngih pah kan dơi kan geh trong mkra dôh rklaih jêr jŏt aơ an mpôl hên”.

         Lam n’gor Dak Lak aƀaơ geh 624 n’glău dak bât, tâm nĕ geh 14 n’glău dak thủy điện, 610 n’glău n’gâr dak. Wa Nguyễn Hoài Dương, Kruanh N’gâng kan tuch tăm mât rong n’hanh hun hao ƀon lan Dak Lak an gĭt, n’gor năl geh 100 n’glău dak bât lĕ djơh, tâm nĕ geh 12 dak bât geh roh đăp mpăn tâm yan mih phŭt năm aơ. Âk dak bât bah ăp n’glău geh pĭch rlâm, dak rchoh jru lăp jâng bât, geh rluh, dak rchoh, dak lăp. Tâm nĕ, nău jŭr djơh, khuch ta ăp n’glău n’gâr dak mpeh mât uănh bah Công ty cà phê mpeh tâm Tổng công ty cà phê Việt Nam dơi năl lah hô ngăn. Yơn lah, yor tơm prăk bah n’gor đêt, n’gor ŭch tât nău ntop kơl bah trung ương mư dơi mkra:

Tŭng n’glău ka bah dâng jâng dak bât Ea Tul 1, nkuăl Krông Ana

         “Aƀaơ, jêh âk năm dŏng ri âk dak bât lĕ jŭr djơh, khuch hô, roh đăp mpăn hô tâm yan mih phŭt sial. Aơ lah nău dŭt têh, tâm rnôk nĕ, tơm prăk bah n’gor dôl dŭt jêr jŏt. Dă đă Trung ương dŭt n’hâm uănh mĭn, ntuh kơl ăp tơm prăk gay nkra ăp n’glău dak bât roh đăp mpăn. Tal 2, dăn đă n’gâng kan tuch tăm mât rong n’hanh hun hao ƀon lan ntĭm rđău Tổng công ty Cà phê Việt Nam an jao an ăp n’glău bât ăp công ty cà phê dôl mât uănh sĭt an ƀon lan gay uănh lah, nkra tay ndơ̆ an mât uănh, pơk dŏng, tŏng ăp đăp mpăn tâm di ăp nău ntrŭnh aƀaơ”.

         Ăp ndơ dôl geh ta Dak Lak an saơ, nău tơm prăk đêt, mô tŏng prăk nkra, knŭng lah n’gul nkô̆ nău ƀư âk n’glău dak bât ta Dak Lak rgâl jêng ăp play bom dak, nkri tât ƀư khuch. N’gul gâl nkô̆ nău ƀa ƀă lah trong kan mât uănh, rmal nău tih hôm e huch hoch ta n’gor. N’hanh n’gul ta nkô̆ nău aơ, Dak Lak mô kâp ntop kơl bah Trung ương. N’gor mĭn êng, nsrôih mkra nău tih, rŭn in ndring n’gar n’glău dak bât, kơl ăp ndơ ƀư aơ đăp mpăn n’hanh ntêm nkrem dak săk rnglăy lơn./.

                   Nuĭh rblang: Y Sưng Phê Ja