VOV4.M'nông – Rnôk bah năp geh mbơh peh nău 17ha bri, ta tiểu khu 726, ta xă n’har bri Ia Dal, nkuăl Ia H’Drai, n’gor Kon Tum geh nuĭh ƀon lan muih kăl sŏk neh tuch tăm lŏ mir n’hanh dăch aơ nu nău mhe dơi uănh. Nău dôl lah tâm rnôk rmal nu nău saơ âk nkô̆ nău ndal, kơt rnoh neh geh phah mô di lah bri n’hanh âk nău mô rah wah mpeh ntŭk kan mât uănh rnoh neh aơ.

Tơm si lĕ geh kăl nsiang gay sŏk neh tuch tăm ƀư mir

Dŭt âk rnoh neh 17ha aơ, nuĭh ƀon lan lĕ tăm bum n’hanh điều. Tâm nĕ, geh lôk điều âk năm, geh rnoh neh mhe phah, mhe tăm. Nău 17ha bri ta xă Ea Dal, nkuăl H’Drai, n’gor Kon Tum geh kăl gay sŏk neh ƀư mir lĕ dơi săk Bí thư N’gor ủy Kon Tum Dương Văn Trang ntĭm rđău ƀư kloh bah bôk khay 6. Yơn bơi du khay lĕ rlău, nău mbơh bah ăp ntŭk kan geh tât hôm e vĭ wah n’hanh mô kloh rah wah. Yơn lah, nău ngăn mô dơi dơn ta aơ lah dŭt âk tơm si lĕ kăl, su phah n’hanh nu nău jŏ jong ma mô dơi nking n’gang, n’hanh rmal ơm.

Nuĭh rblang: Y Sưng Phê Ja