VOV4.Mnông- Đặc phái viên bâh Mỹ mpeh nău Triều Tiên nar 24/10 kuăl đă Triều tiên rlu ăp nău kan rlong pănh grăp phao ŭnh dơi geh uănh lah nău mĭn rvê n’hanh mô geh tâm di nkre lah plơ̆ tay ta rơh tâm nchră. Đặc phái viên bâh Mỹ mpeh Triều Tiên Sung Kim nar 24/10 lĕ geh rơh rƀŭn nchră đah ăp nuĭh kan têh Hàn Quốc gay ma tâm nchră mpeh ăp rơh rlong pănh grăp phao ŭnh dăch aơ bâh Triều Tiên geh nău pănh grăp phao ŭnh bôk ndrak mŭr tâm dak bôk năp bâh dak aơ tâm bar năm ba năp.  Ăp rơh rlong grăp phao ŭnh geh ƀư tâm rnôk ăp nău nsrôih nchră nău đah dak bah dih Mỹ n’hanh Triều Tiên dôl geh kŏ văk. Wa Sung Kim lah na nê̆, Mỹ kuăl đă Triều Tiên rlu dâl ăp nău kan tâm nsĭch n’hanh ƀư geh nău uh ah n’hanh tât râng tâm nchră. Wa Sung Kim lĕ an gĭt đŏng ăp nuĭh kan têh Mỹ mbra geh tâm mâp măt ăp nuĭh kan têh Triều Tiên ma mô kâp geh ăp nău kan bôk năp n’hanh lĕ mbơh na nê̆ Mỹ mô geh nău nchrăp plơng lơh đah Triều Tiên.

Nuĭh rblang: Thị Đoắt