VOV4.M’nông: Lah ta rơh hop báo mhe aơ, Tư lệnh ăp mpôl tahen dak bah dih tă bah Mỹ mât bôk ta Afghanistan- tướng Austin Scott Miller mbơh, Mỹ n'hanh Nhih pah kan tâm ton tahen Bắc Đại Tây Dương (NATO) hŏ ntơm rhuăt tahen luh bah du đêt ntŭk gŭ nde ta Afghanistan. Wa Miller an gĭt tay, lôch rhuăt luh tahen, lĕ rngôch ăp ntŭk gŭ nde mbra dơi jao tay an mpôl tahen bah Afghanistan. Nău mbơh ndơ̆ luh lôch Tổng thư ký NATO Jens Stoltenberg mbơh gĭt trong nchrăp bah mpôl mbra ntơm rhuăt tahen luh bah Afghanistan tâm nar 1/5. Nchrăp rêng ƀư dja mbra dơi ƀư lôch jêh tâm bar pe khay. Tâm rnôk nê, Tổng thống Mỹ Joe Biden mhe aơ mbơh na nê̆ trong nchrăp mpeh nău rhuăt luh lĕ rngôch tahen Mỹ luh bah Afghanistan, lôch jêh bah năp nar 11/9 năm aơ, di tâm rnôk nkah ndray 20 năm geh mpôl lơh ndjơh rdôl lơh tâm nar 11/9/2001.

Nuĭh rblang: Điểu Thân