VOV4.M’nông: Ta năp nău mpet jâk nar lơn ma âk bah Taliban, tahen Afghanistan dôl ndăn joi trong rdâng lơh, tâm rnôk Mỹ ton kơl mât tay rnă njrăng bah neh dak Nam Á dja đŏng. Let năp tay, ăp mpôl tahen Taliban hŏ pit lơh tay âk mpông n'har bri n'hanh ăp quận, nkuâl. Mpôl tahen dja hôm mpă wêl du đêt nkual ƀon têh tơm khlay ta lam dak đŏng. Tướng Kenneth McKenzie, Tư lệnh Bộ Chỉ huy tơm nklang bah tahen Mỹ lah rjăp, Mỹ mbra ƀư rdôl lơh tay ma ndeh păr gay ntop kơl tahen Afghanistan lơh tât dơi n'glĕ dŭt đah Taliban. Tướng Kenneth McKenzie nkre mbơh njrăng lor, nkual ƀon têh khlay bah Afghanistan mbra tâm rdâng đah du nău ntul rlong dŭt rgŭt n'gĭng tâm ăp nar tât, nklăp nău tâm lơh mbra jêng hô lôch nar rlu bah nuĭh Hồi giáo n'hanh Taliban mbra rgum tâm rnoh tât ntŭk lơh ndrop lah ăp ntŭk rgum âk nuĭh ta  nkual ƀon têh./.

Nuĭh rblang: Điểu Thân