VOV4.M'nông: Ta rơh ntơm pơk Pơh lễ gưl têh rơh hop Đại hội đồng Liên hợp quốc tâl 76 ta nhih pah kan Liên hợp quốc ta New York, Mỹ, Tổng thống Mỹ Joe Biden n'hanh Kruanh Trung Quốc Tập Cận Bình hŏ ndrel ndơ̆ luh ăp nău ton dăng tâm rơh rdâng lơh rgâl duh nđik trôk nar. Nău ton ndơ̆ luh bar pe pơh lôch rnôk ƀư tâm nchră Liên hợp quốc mpeh rgâl duh nđik trôk nar (COP26), nchrăp ƀư ta Anh, hŏ geh nău plơng ơh uĕh bah ăp dak lam ntŭr neh. Kruanh Trung Quốc Tập Cận Bình an gĭt, Trung Quốc mbra mô rdâk njêng ăp trong nchrăp kan điện si ônh mhe ta dak bah dih. Kruanh rđău kan Trung Quốc nkre ton n'hao dăng nău ntop kơl ăp dak dôl hun hao tâm nău hun hao ŭnh nar kloh uĕh n'hanh ăp carbon đêt. Mpeh Mỹ, bah năp nê, tâm nău lah bôk năp ta Đại hội đồng Liên hợp quốc, nar 21/9, Tổng thống Mỹ Biden an gĭt dak Mỹ mbra n'hao dăng ăp nău ton đah ăp nău nsrôih rdâng lơh rgâl duh nđik trôk nar, đah nău mbơh n'hao rlău bar tơ̆ ăp tơm prăk dak bah dih gay kơl ăp dak dôl hun hao tâm rơh rdâng lơh rgâl duh nđik trôk nar./.

 Nuĭh rblang: Điểu Thân