VOV4.M'nông: Rlău 20 năm sĭt krêp dêh đah Nhih nti THCS Nguyễn Trường Tộ, ta xã Ea H’Đing, nkuâl Cư M’gar, n'gor Dak Lak, nai ntĭm Lương Hữu Hải bol ma rêh du hê ta jay manh gŭ ma hŏ kơl hang rhiăng kon se nti ach o mô kâp rlu nti n'gul wah. Mô dơn nti si ƀŭt, nai hôm kơl ăp kon se gŭ ngai geh ntŭk manh  gŭ dơm, ndăn dŏng kho ao, si ƀŭt, ndeh wah jâng pă an ăp kon se nti jêr jŏt; dơn mât ăp kon se nti geh nău rêh dŭt jêr jŏt mha êng kơl ăp kon se hăn nti.  

Ntơm bah âk năm aơ, rot jay manh gŭ kêng dŭt trong njônh ta buôn Ea Sang, xã Ea H’Đing, nkuâl Cư Mgar, n'gor Dak Lak jêng ntŭk nde n'hŭt răm ăp kon se ach o kon se nti nkual rnoi mpôl đê̆. Aơ lah rot jay tă bah nai ntĭm Lương Hữu Hải, nai ntĭm tiếng Anh, Tổng phụ trách đội Nhih nti THCS Nguyễn Trường Tộ manh, mô dơn lah ntŭk an 30 kon se nti ach o manh gŭ dơm, ma hôm lah ntŭk nai kơi ntĭm dơm tiếng Anh an nklăp 150 kon se nti geh nău rêh jêr jŏt đŏng. Ndrel đah nê, nai hôm dơn kơl mât an âk kon se nti geh nău rêh jêr jŏt mha êng đŏng. Lah ngoăy tâm ăp kon se nti dơi nai Hải dơn mât bôk, oh H’Ba Su Đi M’lô nkoch:   

 “Rnăk gâp dŭt jêr jŏt, me bơ̆ hăn kan ngai. Bar hê oh yuh gŭ n'hanh u che. Ntơm bah rnôk nai Hải kơl ntơm bah ndơ sa, ndơ nsoh ri gâp dŭt nkah gĭt. Gâp mbra nsrôih kơt nti gay mô hât ma nai mpŏng nơm”.

  Nai ntĭm Lương Hữu Hải hŏ krêp dêh đah nhih nti THCS Nguyễn Trường Tộ, ta xã Ea H’Đing, nkuâl Cư Mgar, n'gor Dak Lak rlău 20 năm. Aơ lah nhih nti tâm nkual rnoi mpôl đê̆, nău rêh bah nuĭh ƀon lan hôm dŭt âk jêr jŏt. Nkoch mpeh ăp nău kan bah he, nai ntĭm Lương Hữu Hải nkoch:

  “Săk gâp nơm krêp dêh đah me neh Tây Nguyên ntơm bah jê̆, ntơm bah nti jrô 3, jrô 4. Ntơm nơh dŭt jêr jŏt gay ma hăn nti, dơi nai ntĭm nti, băl mpôl kơl ri rnôk gâp plơ̆ tay ta aơ, gâp saơ ân ƀư du ntil nău nê nơh gay nkah gĭt tât nai ntĭm nti. N'hanh lơn lah ta aơ nkual rnoi mpôl đê̆ ăp kon se dŭt jêr jŏt, i ngăn nău rlu nti bah ăp kon se geh dŭt âk jêng gâp saơ ân geh du gâl nău dơn kan ntop kơl ăp kon se".  

   Wa Bùi Đình Thảo, Hiệu trưởng Nhih nti THCS Nguyễn Trường Tộ an gĭt, nkual rnoi mpôl đê̆ ta nkual jru nkual ngai dja, ăp nai ntĭm mô dơn ntĭm nti dơm ma hôm geh nău dơn kan rgŏ jă, kơl kon se nti mô ntlơi nti n'gul wah pah kan trong. Âk năm aơ, nai Lương Hữu Hải way lah nai ntĭm dâk leo lor tâm trong kan dja.

“Nai ntĭm Lương Hữu Hải tâm ăp năm mhe aơ hŏ geh ăp nău kan dŭt na nê̆, lơn lah pah kan nkoch trêng rgŏ jă, ntop kơl drăp ndơ dŏng an ăp kon se nti, lơn lah kon se nti rlău dơi jêr jŏt ta xã Ea H’Đing lah nsum n'hanh nhih nti THCS Nguyễn Trường Tộ lah êng. Nai hŏ rlău dơi ăp ntil nău jêr jŏt êng, yor nai Hải aƀaơ dŭt jêr jŏt đŏng, nai gŭ rêh du hê, nhih jay mô geh. Nai sơch nkual gŭ nsum huêt jê̆ ntop kơl an kon se, lơn lah kơl ăp kon se ach o mô geh ntŭk gŭ. Măng  nai hôm ƀư nti dơm an du đêt kon se wăr ntŭk jay manh gŭ nê. Mpôl hên rong kơl du đêt mpeh mông nar n'hanh ndơ rsong hăn, ntop kơl mpeh pah kan nsŏng kơl đah n'gâng kan ta ntŭk đah nău kan bah nai ntĭm".

    Wa Nguyễn Hữu Nhất, Kruanh UBND xã Ea H’Đing an gĭt ăp năm nai Lương Hữu Hải hŏ ntop kơl, rgŏ jă nklăp 30 kon se nti geh nău rêh jêr jŏt ntlơi nti plơ̆ nti tay. Ntơm bah bôk năm nti tât aƀaơ, nai Hải hŏ rgŏ jă hang rbăn ndrôm si ƀŭt, kho ao mhe, ndeh wah jâng...lĕ rngôch rnoh khlay 200 rkeh prăk ntop kơl kon se nti jêr jŏt nuĭh rnoi mpôl đê̆. Tâm rơh nuh srê ntoh luh mhe aơ, nai Hải hôm rgŏ jă 65.000 bok put mbung, rlău 460 dak si puh kaman n'hanh 21 máy weh duh săk ntop kơl an n'gâng kan njrăng, n'gang nuh srê.

“Ma ăp nău kan buăt nthoi đah ăp câu lạc bộ tâm rŏng n'hanh nuĭh bah dih n'gor, nai hŏ rgum ôp uănh tay ăp kon se nti nkual rnoi mpôl đê̆ ta ntŭk jêr jŏt mô tŏng geh mpeh si ƀŭt nchih, ăp ndơ dŏng nti. Nai hŏ buăt nthoi n'hanh tĭng ƀư ăp trong hăn kơl ndơ n'hanh kơl dŭt âk kon se nti jêr jŏt ta nkual. Tâm pah kan njrăng, n'gang nuh srê Covid-19 ta ntŭk, tâm bah ri aơ nơh nai hŏ buăt nthoi đah ăp nai ntĭm nti lŏng nuih n'hâm kuăl jă, ntop kơl ăp nklâm ndơ an nuĭh ach o, jêr jŏt, nuĭh an gŭ rgum êng, mpă wêl đŏng. Kuăl jă an ăp nhih nti ăp máy puh nkhĭt kaman, máy weh êng duh săk, bok put mbung".

Ma nău tâm rŏng, nai ntĭm Lương Hữu Hải hŏ nkêh an êng du ding nău geh êng an săk nơm, kơl njuat jâng hăn an hang rhiăng kon se nti jêr jŏt hăn tay nhih nti, jêng nuĭh gĭt blău uĕh an nău rêh jêng kon nuĭh./.

                             Nuĭh rblang: Điểu Thân