VOV4.M’nông: Tổng thư ký NATO Jens Stoltenberg nar 27/7 an gĭt, mpôl kan dja mbra ntop kơl Afghanistan lôch rnôk ăp mpôl tahen dak bah dih rhuăt luh tahen bah dak dja. Ta Twitter, wa Stoltenberg an gĭt, păng hŏ nkoch bri đah Tổng thống Afghanistan Ashraf Ghani. Lĕ bar ding lah rjăp, nô nău ta Afghanistan hôm ntul rlong dŭt âk rnôk Taliban hao mpet mbro tât n'gâng kan ta thủ đô Cabul. Tổng thư ký Stoltenberg lah rjăp, NATO mbra ntop kơl tay Afghanistan, lĕ ma kơl drăp ndơ, nău ntoh măt nuĭh kan n'hanh ntĭm nti. Mhe aơ nơh, mpôl tahen Taliban hŏ rdôl lơh n'hanh pit in ăp nkuâl ƀon lan n'hanh ăp nkual ƀon têh tơm khlay bah ăp n'gor kiău ma lôch rnôk Tổng thống Mỹ Joe Biden mbơh tâm khay 4 lah Mỹ mbra rhuăt luh lĕ rngôch tahen luh bah dak dja tâm khay 9, ntơm dŭt bah ngăn an bơi 20 năm ntoh măt tahen bah Afghanistan./.

Nuĭh rblang: Điểu Thân