VOV4.M’nông - An dŏng mât njrăng bri dak Ấn Độ tâm năm 2021 lĕ geh tât 77 rmen đôlar, hao 33% nkôp đah năm 2012. Tĭng dữ liệu bah Ntŭk gŭ mĭn njêng Hòa Bình Quốc tế mbơh mhe aơ, Ấn Độ lah dak an dŏng rhŏ an tahen âk tal 3 lam ntŭr neh, bah kơi Mỹ (801 rmen đôlar) n’hanh Trung Quốc (nklăp 293 rmen đôlar). Ấn Độ kơl lor rgâl mhe ăp rmôt vũ trang n’hanh nkra njêng êng ndrăk nsiu tĭng nău mĭn mhe “Nkra njêng ta Ấn Độ”. Nău kơl aơ geh tâm rnôk duh jêr n’har bri đah Trung Quốc n’hanh Pakistan geh jêr jŏt, geh nău ntoh jêng ăp nău tâm lơh vũ trang. Nău rƀŏng bah chính phủ Ấn Độ lah ndơ̆ neh dak aơ luh ntŭk dơh geh khuch bah năp ăp rnă njrăng. Aƀaơ Ấn Độ dơi uănh lah dak nglăp rwăt ndrăk nsiu âk ngăn lam ntŭr neh, geh 11% dĭng lĕ ndrăk nsiu nglăp rwăt lam ntŭr neh.

Nuĭh rblang: Y Sưng Phê Ja