VOV4.M'nông: Thủ tướng Anh Boris Johnson hŏ geh hăn khâl ngăn Ấn Độ ntơm bah nar 21-22/4 n'hanh rgum nchră đah nuĭh ndrel gưl kan Narendra Modi. Aơ lah hăn khâl lor bôk năp bah wa Boris Johnson tât Ấn Độ kalơ nău kan ƀư Thủ tướng. Ta rơh tâm nchră, bar kruanh rnê âk ăp nău dơi geh tâm "Trong tor gĭt năm 2030" dơi ndơ̆ luh tâm khay 5/2021 n'hanh nkah tay nău ton ntrŭt ntrôl tâm boh lhăt lơn n'hanh geh trong rƀŏng tâm boh bar ding đah bar dak. Bar ding rnê âk tâm nchră dah rŏng tăch rgâl (FTA) dôl ƀư n'hanh tĭng ƀư nău tâm ton tăch rgâl n'hao têh. Bar ding tâm ban ŭch mbra ký ton du nău tâm ton tăch rgâl geh nău tâm ban n'hanh lam lĕ rngôch tâm khay 10/2022, nău ŭch n'hao geh âk rlău bar tơ̆ tăch rgâl bar ding tâm năm 2030.  

Nuĭh rblang: Điểu Thân