VOV4.M’nông: Kêng măng 10/6, êp rơh rƀŭn tâm nchră Shangri-La tal 19 ta Singapore, Đại tướng Phan Văn Giang, Kruanh N’gâng kan neh dak hŏ geh pe rơh tâm mâp bar ding đah Kruanh N’gâng kan neh dak Singapore Nga Eng Hen, Kruanh n’gâng kan neh dak Hoa Kỳ Lloyd Austin ndrel Kruanh n’gâng kan neh dak Canada Anita Anand. Ta rơh tâm mâp bar ding đah Kruanh N’gâng kan neh dak Singapore Nga Eng Hen, bar Kruanh n’gâng kan tâm ban nau rƀŏng tâm boh tâm rơh tât, rgum tâm nau kan n’hao nau tâm rgop ƀư đah ăp rmôt tahen, binh chủng du trong nâp tam ngăn, tâm di đah nau geh jêng ndrel nau ŭch bah ăp ding. Tâm rơh tâm mâp đah Kruanh n’gâng kan Phan Văn Giang đah Kruanh n’gâng kan neh dak Hoa Kỳ Lloyd Austin, bar ding ntrŭt dăng nau tâm ban đah ăp nau ntrŭt dăng tâm boh tĭng ăp nkô̆ nau tâm nau nkah mpeh nau ntrŭt dăng tâm boh neh dak ký tâm năm 2011 ndrel nau ton lah nsum mpeh nau rƀŏng nsum mpeh nau tâm boh neh dak ký năm 2015, kơl an nau ndâk tay nau tă khuch bah nau tâm lơh kăl e, tâm nê geh nau ntrŭt dăng nau kan  rklaih nau khih dak si Đioxin tâm tach ndeh mpăr Biên Hoà kŏ kơt lah nau rgum tu tơm gay ma rklaih lĕ ntŭk khih ndjơh dak si Đioxin ta aơ./.

Nŭih rblang: H’Thi