VOV4.M’nông – Kruanh n’gâng kan mât njrăng bri dak Đức tâm nar 6/2 mbơh, Đức dôl uănh mbơh ƀư ntop tay tahen tât Lít-va tâm rnôk duh jêr hôm e âk yor Nga đă tahen tât êp n’har bri Ucraina. Kruanh N’gâng kan mât njrăng bri dak Đức du tơ̆ tay ntlơi nău pă an ndrăk nsiu an Ucraina, jêh rnôk Ucraina dăn ntop kơl ndoh ndơ kơt ăp trong njrăng n’gang grăp phao ŭnh, ndoh ndơ tâm lơh điện tử, bil uănh măng, radio kỹ thuật số, trạm radar n’hanh ndeh rdêng tahen sôt rmanh. Bah năp nĕ, NATO lĕ ƀư 4 ntuk tâm lơh âk dak đah dĭng lĕ nklăp 5.000 tahen ta Ba Lan, Lít-va, Lát-vi-a n’hanh Ét-stô-ni-a. Jêh rnôk Nga ndơ̆ âk rbăn tahen tât êp n’har bri dak Ucraina, Mỹ lĕ đă tay nklăp 3.000 tahen gay ntop kơl mpeh bah lơ bah NATO ta Ba Lan n’hanh Ru-ma-ni.

Nuĭh rblang: Y Sưng Phê Ja