VOV4.M’nông- Tâm du nău mbơh tơih ta năp Quốc hội nar 29/3, n’gâng kan mât rnă njrăng ngih dak Hàn Quốc an lah, grăp phao ŭnh rgŏ play neh (ICBM) bâh Triều Tiên geh pănh ta pơh ba năp tâm ban kơt Hoa-song 15 (Hwasong-15) lĕ rlong pănh ta năm 2017, nkre lah dun nău mbơh bâh Bình Nhưỡng mpeh nău lĕ rlong dơi grăp phao ŭnh mhe ntoh. Nău mbơh tơih lĕ uănh năl, Triều Tiên lĕ mô dơi ta rơh pănh grăp phao ŭnh geh tât Hoa Song 17 nar 16/3 nơh. Yor kơt nĕ, nău rlong du grăp phao ŭnh pănh rgŏ play neh mhe geh nău dơi kanŭng lôch 8 nar lah nău ma jêr dơi geh. Yơn lah, n’gâng kan mât rnă njrăng ngih dak Hàn Quốc lĕ kơp dơn, Triều Tiên dôl joi trong mpơl nău ueh mhe tâm nău dơi hun hao grăp phao ŭnh bôk ndrak rgŏ play neh, mât đăp mpăn dơi dơi têh ngih dak tahen n’hanh n’hao nău kan ta năp ăp rơh tâm nchră đăp mpăn tâm let năp tay.

  Nuĭh rblang: Thị Đoắt