VOV4.M'nông: Nar ntri (11/5), Hội đồng Bảo an Liên Hợp Quốc hŏ ƀư rơh rgum  hop mpeh nchră mpeh ăp rơh pănh grăp ŭnh mhe aơ bah Triều Tiên, tâm ban kơt ăp nău klach rvê mpeh dak dja mbra rlong pănh grăp ŭnh hạt nhân. Ta rơh hop, Đại sứ Mỹ ta Liên Hợp Quốc wa Linda Thomas-Greenfield kuăl jă Nga n'hanh Trung Quốc rlăch dun nău kan bah Triều Tiên; nkre mbơh njrăng lor Hội đồng Bảo an “mô dơi ât ndâm" rnôk Triều Tiên bơi rlong pănh hạt nhân tâl 7. Tĭng păng, hŏ tât rnôk an rlu pă an ăp nău an ƀư hôch n'hanh ntơm dâk kan. Lam ntŭr neh mô dơi kâp an tât rnôk Triều Tiên geh tay ăp nău kan jreh nuih mhe. Yơn lah, Nga n'hanh Trung Quốc hŏ rlăch dun si ƀŭt tâm nchră nghị quyết ntrŭt ntrôl rmal Triều Tiên bah Mỹ. Đại sứ Trung Quốc ta Liên Hợp Quốc Trương Quân (Zhang Jun) lah rjăp, nău ntrŭnh rmal mô di lah trong ƀư  tâm di gay nkra nô nău./.

Nuĭh rblang: Điểu Thân