VOV4.M'nông: Mbơh mpeh đăp mpăn ndơ sa dơi Bộ Tài chính Mỹ mbơh nar ntri (18/5) an gĭt, Ngân hàng lam ntŭr neh (WB) mbra pă an 30 rmen đôlar gay nkra bah mô tŏng ndơ sa lam ntŭr neh. Na nê̆, tâm rnoh 30 rmen đôlar dja geh 12 rmen đôlar dơi dŏng an ăp trong nchrăp kan mhe n'hanh 18 rmen đôlar mbra dŏng gay ntuh kơl tâm ăp trong nchrăp kan geh tât ndơ sa hŏ dơi ŭanh an dŏng yơn mô hŏ dơi an ƀư. Bah năp nê, lah ta rơh họp báo pơk sŏng dăng bah ngai tâm Trôm rơh tâm nchră khay năm mhe 2022 bah Prăk nkrem lam ntŭr neh (IMF) n'hanh Ngân hàng lam ntŭr neh (WB) nar 20/4, Kruanh Ngân hàng lam ntŭr neh Davis Malpass nkah tay đŏng nău ton rdâk njêng du tơm prăk nkrem kơl ngăch rnoh khlay 170 rmen đôlar tâm 15 khay tât gay ntop kơl ăp dak ach o dôl geh tât khuch bah âk rơh duh jêr, tâm nê geh rnă ntêm ndơ sa./.

Nuĭh rblang: Điểu Thân