VOV4.Mnông- Nar 17/2, rơh rƀŭn nchră gâl têh đah âk dak kan ndrel châu âu EU n’hanh âk dak kan ndrel châu Phi AU lĕ ntơm pơk ta Brussel dak Bỉ. Ngoăy tâm âk nău ntoh lư bâh rơh rƀŭn nchră lah nău tâm ton bâh âk dak kan ndrel châu âu kơl an 150 rmen ơ rô an châu phi, ndrel đah du nău tâm ton ŭch rŏng mpeh nău wăng sa n’hanh tơm prăk gay ma kơl an nkual neh aơ ndâk nsơm lôch geh nuh srê, tâm ban kơt ŭch knơm mpeh ntuh kơl, ndơ dŏng, dak si, tung trong, rnă njrăng n’hanh ntĭm nti. Ngoăy tâm âk nău ntul rlong dŭt têh bâh châu âu lah mhâm ƀư gay ma rhoăt an bah ir geh nău tâm ƀah mô tŏng chuh vacxin ta châu Phi. Bol ma lah ntŭk ƀư vacxin dŭt âk ta lam ntur neh, yơn châu âu mhe geh tăch 8% rnoh vacxin tăch an dak bah dih tât châu phi. Rlău ma nău dak si, châu âu dôl geh nău nchrăp n’hao nău ntuh kơl ta ndơ dŏng ntung trong, ngă lah ta trong kan ntĭm nti, rgâl mhe ŭnh nar, rgâl mhe kĩ thuật mbrô n’hanh hun hao nău pah kan jan sa ta châu phi.

Nuĭh rblang: Thị Đoắt