VOV4.M’nông - Thủ tướng Pakistan Imran Khan lĕ ngơi kuăl jă Trung Quốc n’hanh ăp dak Islam nsrôih dâk ƀư ta n’gul rsaih nkra nău duh jêr Nga-Ukraine gay dơi geh rlu pănh jŏ jong. Rmôt kan ndrel Islam lam ntŭr neh (OIC) dôl ƀư rơh rƀŭn tal 48 bah Hội đồng Kruanh n’gâng kan nchră nău đah 600 nuĭh ntoh măt tât râng, tâm nĕ geh Kruanh N’gâng kan nchră nău Trung Quốc Vương Nghị đah nuĭh jă dŭt khlay, ta thủ đô Islamabad, Pakistan. Ntoh ngơi ta rơh rƀŭn, Thủ tướng Pakistan đă Rmôt kan ndrel Islam lam ntŭr neh tâm rơh tâm nchră đah kruanh n’gâng kan nchră nău, nău geh ŭch tâm ban ŭch du trong mkra nsum ƀư ta n’gul rsaih nkra gay geh rlu pănh ơm ngăn. Nuĭh kruanh Pakistan mĭn lah, tâm lơh jŏ jong mbra ƀư khuch nsum, yor nê, ăp dak Islam ndrel Trung Quốc an tâm rgop kan ndrel rjăp tâm nău ƀư rsaih nkra nău ta n’gul.

Nuĭh rblang: Y Sưng Phê Ja