VOV4.M’nông: Chính phủ Singapore mbơh hŏ n’hao nau kan mêt uănh nau mât rnă njrăng gay ueh ân trong hăn geh kloh n’ho kŏ kơt lah nau mât rnă njrăng đăp mpăn ân ăp ntoh măt râng tâm nchră Shangri-la tal 19. Kruanh n’gâng kan neh dak Singapore lah rjăp mra tâm rgop ngăn đah Rnâng kan, ăp ntŭk kan nsum gay ma ndak nau kan đăp mpăn prêh ngăn ndrel mra rgâl ân tâm di đah nau dơi gay mât ntoh măt rnâng kŏ kơt lah nŭih ƀon lan Singapore.

Âk rbăn tahen tâm ăp rmôt tahen Singapore kŏ geh rgum, n’hao nau mât rdâng đah ăp nau tât khuch ngăn tât rmôt nau đăp mpăn, rnă njrăng bah nau tâm nchră. Nau tâm nchră Shangri-La tal 19 năm 2022 geh nthoi jêh 2 năm nsrŭng yor nau khuch bah srê Covid-19. Nau tâm nchră năm aơ geh ntơm lơ 10-12/6, rgum nklăp 500 nŭih ntoh măt lah n’gâng kan Chính phủ, n’gâng kan neh dak-rnă njrăng, nchră nau, nŭih mĭn njêng, học giả, nŭih ƀư nau kan tăch rgâl...tă bah 50 dak ndrle nkuăl neh lam ntur neh./.

Nŭih rblang: H’Thi