VOV4.M’nông- Ta rơh rƀŭn nchră gâl têh châu Mỹ rơh bôk năp geh ƀư ta Mỹ lôch bơi tât 3 jât năm, Tổng thống Joe Biden mhe aơ geh mbơh nău tâm kơl wăng sa mhe an nkual Tây bán cầu gay ma rdâng tay đah nău khuch khat ăp nar lơ ma hao bâh Trung Quốc. Geh ntơ “Dak kan ndrel châu Mỹ yor nău hun hao têh kuăng bâh wăng sa”, nău nchrăp wăng sa geh âk nău ŭch rŏng bâh Tổng thống Joe Biden rgum ntrôl ndâk nsơm nău wăng sa bâh nău n’hao ăp nău tâm ton tăch rgâl aƀaơ geh. Ntoh ngơi ta rơh ntơm pơk, Tổng thống Joe Biden lah na nê̆, Mỹ n’hanh ăp ngih dak ta nkual an geh ntuh kơl gay ma mât đăp mpăn du n’gâng kan tăch rgâl nâp nâl n’hanh geh nău dơn kan tâm nău njêng ăp rnoh pă an tâm di lơn, đăp mpăn lơn n’hanh nâp nâl lơn. Ăp rơh tâm nchră mpeh nău tâm kơl wăng sa mhe đah Mỹ n’hanh ăp dak Mỹ La tinh nchrăp mbra geh ntơm bâh khay iang tât tay.

Nuĭh rblang: Thị Đoắt