VOV4.M’nông: Lơ 24/3, Triều Tiên pănh du ntil ndơ geh ân lah phao ŭnh mhe ngăn yor dak aơ nkra geh moh lah Hoa-xông 17. Nhật Bản mbơh, ntil ndơ aơ geh pănh hao klơ trôk ndrel ma tŭp tâm nkuăl neh văng sa bah dak aơ. Tổng thống Hàn Quốc Mun-chê-in hŏ rgum rƀŭn bah rmôt kan mât đăp mpăn neh dak, ndơn lah rđau kan Triều Tiên jăng lơi nau tâm ton đah ăp ding. Ntoh nau tâm nar rƀŭn, Tổng thống Mun-chê-in ton, đah nau kan rlong pănh kơt nê, rđau kan Triều Tiên Kim jong Un hŏ ƀư jăng lơi ăp nau ton rlu păng phao ŭnh hao klơ trôk ndrel nau rlong ndrak nsiu geh Triều Tiên kí đạh Mỹ năm 2018. Tĭng rđau kan bơi lôch năm kan bah Hàn Quốc, ăp nau rlong pănh ndrak nsiu bah Triều Tiên dôl nkra lĕ gôl dak ndrel nkuăl. Hàn Quốc nduh lah ngăn nau pănh aơ. Tâm rnôk nê, rmôt mât mpông dak lêng Nhật Bản mbơh nau ndal tât ăp duk mpan mpeh nau rlong pănh. Ntơm bah Brussel, Bỉ, rnôk râng rơh rƀŭn gưl prêh G7, Thủ tướng Nhật Bản Fumio Kishida kŏ moh nau pănh mhe bah Triều Tiên lah nau kan mô dơi geh ndơn./.

Nŭih rblang: H’Thi