VOV4.M'nông: Trung Quốc mbra tâm boh đah ăp ding ntrôl ngăch bôk nău kan nchrăp lor rơh tâm nchră 2030 mpeh hun hao jŏ jong bah Liên Hợp quốc. Aơ lah nău lah bah Nuĭh ntơh ngơi Bộ Ngoại giao Trung Quốc Triệu Lập Kiên ta rơh họp báo way ăp khay nar 6/4. Tĭng wa Triệu Lập Kiên, “nău mĭn hun hao lam ntŭr neh” bah Trung Quốc gay ntrôl ngăch tĭng ƀư bôk nău kan nchrăp lor nău tâm nchră 2030 bah Liên hợp quốc, tĭng ƀư tâm boh âk ding, tĭng nuih n'hâm tâm boh pơk hvi, nkrum lam n'hanh nău way nsŏng kơl jru hvi. Kơp ntơm bah rnôk nău mĭn mhe dơi dăn đă, nsum mpôl lam ntŭr neh hŏ tĭng n'hanh nsrôih râng, rlău 100 dak n'hanh âk mpôl kan dak bah dih mpơl nău  ŭch. Tĭng wa Triệu Lập Kiên, Trung Quốc mbra tâm boh lhăt đah lĕ rngôch ăp dak gay rdâk njêng nsum mpôl hun hao lam ntŭr neh n'hanh ntrôl ngăch nchrăp lor bôk nău kan tâm nchră năm 2030.

Nuĭh rblang: Điểu Thân