VOV4.M'nông: Tĭng nău lư nchih ma tiếng Anh mbơh ăp pơh bah Ntŭk rgum mât kân n'hanh njrăng n'gang nuh srê Trung Quốc, du hê nuĭh ntưp njêng săk mhe BA.4 bah Omicron hŏ năl geh ta Trung Quốc n'hanh aơ lah nuĭh lor bôk năp dơi mbơh geh ta dak dja. Nuĭh ji hăn tât Quảng Châu, n'gor Quảng Đông, miền Nam Trung Quốc bah Hà Lan nar 29/4 n'hanh dơi n'glăp tâm khách sạn an gŭ êng, tât ôi tay geh năl ntưp đah SARS-CoV-2. Nuĭh ji 20 năm deh dja hŏ chuh n'gang ntrôl rŭch n'hanh tĭng jăp ăp nău đă uănh năl nuh srê lor rnôk hăn 14 nar. Ăp nău gŭ mĭn hŏ nchŏng luh an lah njêng săk mhe dja mbra geh nău dăng chŏl uĕh lơn ta ăp nuĭh hŏ tă geh chuh vaccine tâl 3 n'hanh mbra luh bah ăp săk dăng chŏl njêng luh rnôk ntưp Omicron bah năp nê nơh, jêng lah nuĭh hŏ tă ntưp njêng săk mhe Omicron hôm geh plơ̆ ntưp tay Covid-19 đŏng tă bah ntưp bah ntil dja. Tât aƀaơ, rlău 1.300 nuĭh ntưp njêng săk mhe BA.4 hŏ dơi mbơh dŭt đêt tât 20 dak n'hanh nkual neh lam ntŭr neh./.

Nuĭh rblang: Điểu Thân