VOV4.M'nông: Nar 13/5, Lễ nkah ndray Nar lam ntŭr neh Phật đản Vesak hŏ dơi ƀư pơk sŏng dăng ta nâm nău ƀư tơm bah ăp Đại sứ, Kruanh mpôl đă hăn kan Thái Lan n'hanh Srilanka ta Liên hợp quốc. Ta rơh Lễ nkah ndray, ăp nuĭh mĭn lah da dê nău ntĭm nti, triết lý bah Đức Phật mpeh tâm rŏng, lăp rgum, ndrel du nuih n'hâm yô̆, tâm nkoch, tâm rong, uănh khlay n'hanh tâm gĭt wât nsum lah ntŭk nsing n'hanh tơm suan dăng nuih n'hâm gay nsum mpôl lam ntŭr neh rlău dơi ntul rlong bah nău tâm rkeh, tâm lơh tâm su, nuh srê, rgâl duh nđik trôk nar... Lah ta rơh Lễ nkah ndray, Đại sứ, Kruanh Mpôl đă hăn kan Việt Nam ta Liên hợp Quốc, Đặng Hoàng Giang lah rjăp tâm du lam ntŭr neh tâm rdâng đah ăp ntul rlong n'hanh duh jêr mô hŏ tă geh kơt aƀaơ, triết lý bah Đức Phật mpeh đăp mpăn, tâm rŏng, tâm lăp nsum nar lơn ma geh nkô̆ khlay n'hanh hŏ jêng "du trong hăn sŏng" kơl kon nuĭh bah krŭl tâm nuih n'hâm n'hanh nsĭt tay đăp mpăn an ntil kon nuĭh./.

Nuĭh rblang: Điểu Thân