VOV4.M’nông - Rmôt kan dak si lam ntŭr neh kơp êng, geh tât 65% nuĭh ƀon lan ta Châu Phi lĕ ntưp Covid-19 n’hanh rnoh nuĭh ntưp na nê̆ geh âk lơn nkôp đah rnoh dơi mbơh. Tâm du nău rblang mhe dơi mbơh, Rmôt kan dak si lam ntŭr neh an gĭt, tĭng tâm ăp ntil mham dơi sŏk bah nuĭh ƀon lan châu Phi nklăp tâm bah khay 1/2020 tât khay 12/2021 lĕ geh nklăp 65% rnoh nuĭh dơi uănh năl lĕ ntưp Covid-19, tâm ban đah nklăp 800 rkeh nuĭh ntưp. Rlơ̆ tay, knŭng geh nklăp 8 rkeh nuĭh ntưp Covid-19 dơi mbơh na nê̆ an Rmôt kan dak si lam ntŭr neh tâm năm nĕ. Tât aƀaơ, châu Phi lĕ mbơh 11 rkeh 500 rbăn nuĭh ntưp Covid-19 tâm nĕ geh rlău 250 rbăn nuĭh khĭt. Rmôt kan dak si lam ntŭr neh an gĭt, ăp nuĭh ntưp n’hanh khĭt yor Covid-19 ta châu Phi geh trong hŭch kơp bah khay 1 năm aơ. Tât aƀaơ, geh nklăp 15% nuĭh ƀon lan ta châu Phi lĕ dơi chuh vaccine njrăng n’gang Covid-19.

          Nuĭh rblang: Y Sưng Phê Ja