Tĭng ăp ntoh măt, gay dơi geh nau hun hao rlau 10% lôch năm ntơm rnoh 7,84% rnôk aơ, UBND n’gor Dak Lak ân ơm ndâk nau kan n’hêl, năl kloh ăp nau kan nsôih, tơm prăk mra geh sŏk dŏng ndrel ăp nau kan gay geh nau rgâl. Wa Lê Văn Cường, Kruanh ban Văn hoá-Xxa hội bah HĐND n’gor Dak Lak, đă:‘Gâp đă UBND n’gor ân geh nchŏng kloh dơi lah 6 khay dŭt năm mra moh ntŭk geh bah nau kan, ntŭk kan, bôk nau kan geh leo sŏk dŏng tơm prăk gay ma mât ân geh dơi nau đăp mpăn hun hao lam lôch năm ntơm 10,2% hao gŏ lơ”.

 Nkoch mpeh ăp nau nkol rnôk hao, ăp ntoh măt HĐND n’gor Dak Lak ân lah, lôch nau kan neh ntu, nau kan hành chính, kŏ geh âk nau kan ân geh rklaih. Wa Bùi Thị Hà Giang, Bí thư Đảng uỷ, Kruanh HĐND xã Ea Drăng, n’gor Dak Lak ntoh nau dôl geh tâm ntŭk:“Nau tâm ban nuih n’hâm bah ƀon lan ndrel ntŭk kan tâm nau ƀư nau kan hành chính lah ê geh ueh. Tal bar lah nau kan mât ngih dak mpeh neh ntu, pă săm ƀŭt kơp dơn nau dơi dŏng neh kŏ kơt lah nau kan dŏng neh geh tu tơm tă bah ăp ntŭk tăm bri, mât bri dôl mâp âk nau nkol ma nơm mra jêr geh ƀư lah hun hao văng sa bah xãphung hên lah êng, bah n’gor lah nsum”.

            Rơh rƀŭn bah HĐND n’gor Dak Lak geh ntơm ƀư jêh rnôk n’gor mbơh nau rgum ndrel ƀư geh dơi rơh rƀŭn nchră ntuh kơl. 25 bôk nau kan, rnoh tơm prăk rlau 40.200 rmen prăk hŏ geh pă săm ƀŭt kơp dơn. Ăp tơm ntuh kơl dôl ntrŭnh ƀư tâm Dak Lak kŏ geh nau kan dŭt têh. Yơn lah, tĭng wa Huỳnh Gia Hoàng, Groi Giám đốc N’gâng kan tơm prăk n’gor Dak Lak, gay dơi geh rgop nau ngăn ân ntrong hun hao, lam ntrong kan chính trị ân geh lăp kan rjăp lơn, rklaih nau nkol ndrel ntrơn leo ntŭk gay pă neh ân ƀư nau kan ndrel pă tơm prăk dŏng:  ‘Gay pă tơm prăk dŏng ntuh kơl nsum, ân geh năl kloh aơ lah nau kan nsum bah lam ntrong kan chính trị. Ngăn lah rgum tâm nau kan ntrơn rgâl ntŭk gay ma pă ân neh ƀư nau kan. Ê mâp ôh năm ma tơm prăk dŏng ân ntuh kơl lŏ geh âk kơt nê. Ndri ma gưl kan uỷ, n’gâng kan tâm nkuăl, ngăn lah n’gâng kan tâm dâng, gưl xã, phường, ân geh năl aơ lah nau kan tơm khlay n’ho ro gay ƀư tâm lôch năm kan”.

       Ăp ntoh măt tâm ban nau kơp năl Dak Lak dôl geh âk nau dơi gay hun hao tâm rnôk hun hao dơi geh pơk hvi, rgum nsum hŏ geh mbơh ndrel nau kơl an bah ăp tơm ntuh kơl lơn ma têh. Yơn lah, nau dơi knŭng geh jêng nau nsôih hun hao rnôk ăp nau nkol mpeh ntuh kơl nsum, neh ntu, nau rgum hành chính ndrel nau kan geh ƀư dơi ăp nau doh rklaih năn tâm ăp khay dŭt năm./.