Ta meng nău mât đăp mpăn rnă njrăng, đăp mpăn an rơh thi, ta ntŭk dŭt mât uănh kơl an kon hoc ta nkual njônh ngai, nkual ƀon lan rnoi đê̆ n’hanh ăp oh kon geh nău rêh jêr jŏt, mô an geh kon hoc rnoi đê̆ n’hanh ăp oh kon hoc geh nău rêh jêr jŏt geh nău jêr mpeh hăn nsong, ntŭk gŭ sa khuch tât rơh thi. Rơh thi năm aơ, Đăk Lăk geh ƀư 64 ntŭk thi ngăn, 55 ntŭk thi nchrăp lor đah klâp ma 1.500 jrô thi. Rlău 5 rbăn cán bộ, nai nti, nuĭh kan geh rgum tât râng ăp nău tâm rlong. N’gor lĕ geh pă nău kan na nê̆ an ăp ntŭk kan, n’gâng kan, nkre lah uănh năl lĕ rngôch ăp nău dơh nơih mpeh nău ndơ dŏng, nuĭh kan n’hanh ăp ntŭk njrăng nău tât ndal. Đah ăp ntŭk ta nkual njônh ngai, nkual jêr, ăp ntŭk tâm rgop đah ăp nkual njônh ngai, tâm rgop đah ăp ngih nti uănh năl, geh trong kan kơl an tâm di an kon hoc. Bôk nău kan Vơt kơl yan thi geh mbơh tơih lam ăp ntŭk đah nău tât râng bâh đoàn viên, mom ndăm n’hanh ăp ntŭk kan đoàn thể, kơl an kon hoc mpeh ntŭk gŭ, ndeh klư hăn nsong n’hanh ăp nău khlăy tâm rnôk geh ƀư rơh thi. Ndreh đah nĕ, ăp mpôl kan têh mât đăp mpăn trong hăn, pă điện, mbơh nău tâm ôp n’hanh ăp nău dơh tâm rnôk geh ƀư rơh thi lah geh nău tât ndal.