Tĭng siƀŭt mbơh, tĭng ƀư “500 nar măng” joi, rgum tâp n’hanh năl săk nting tahen ơm khĭt hôm mô hŏ gĭt lư, tât aƀaơ lam dak hŏ rgum saơ 1.080 nting tahen ơm khĭt. Bộ Công an hŏ ra uănh tay, rƀah gĭt nău lư, tâm rđĭl nău lư bah hang rbăn tahen ơm khĭt mô hŏ năl săk dơi mbơh lư; rgum ntil ADN ta âk n’gor n’hanh năl săk an 23 nuĭh. Chính phủ hŏ n’gluh an dŏng Trong nchrăp ƀư ăp nău kan nkah ndray 80 năm Nar Tahen ơm khĭt – Rmanh; rdâk njêng Đề án đah lĕ rngôch prăk dŏng 13.000 rmen prăk ƀư pah kan nkah gĭt nsĭt n’glĭng, mât chăm nuĭh geh n’hâm suan cách mạng. Lah n’glôch jêh Tâm nchră, Groi Thủ tướng Phạm Thị Thanh Trà lah rjăp, nkah ndray 80 năm Nar Tahen ơm khĭt – rmanh lah nar kan chính trị, lịch sử, rŏng nuĭh khlay gưl neh dak; lah rnôk gay lam Đảng, lam ƀon lan, lam tahen nkah gĭt, mpư rnê ăp nuĭh hŏ n’groh săk, an lĕ n’hâm suan têh kuâng bah nuĭh geh n’hâm suan đah neh dak. Groi Thủ tướng đă ƀư ăp nău kan nkah ndray đăp mpăn huêng khlay, ngăn ngăn, nkô̆ hôr, rŏng nuĭh, geh suan ring lam; nkre đah mât chăm uĕh lơn nău rêh drăp ndơ, nuih n’hâm an rnăk tahen ơm khĭt, tahen ơm rmanh, tahen kop ji n’hanh nuĭh geh n’hâm suan.