N’gor Quảng Ngãi mhe ntrŭnh nau nchrăp ƀư hăn joi, rgum leo ndrel nsĭt nting tahen khĭt kăl e tâm trong Trường Chinh tâm phường Đắk Cấm ndrel Phường Kon Tum. Tĭng nê, nau kan kuih, rgum joi mra geh ƀư tâm 3 rơh.  Rơh bôk năp ntơm lơ 6/6 tât 20/6, ăp rmôt kan mra rgum kuih kai tâm neh lơi dơm tâm ntŭk môch tâp khĭt ăp tahen khĭt kăl e tâm Phường Đắk Cấm ndrel hăn joi tâm trong Trường Chính mrô ngih 20-6 tât 282. Rơh tal bar ntơm lơ 21/6 tât lơ 25/7, pơk nau hăn joi tâm ăp trong hôm e bah trong Trường Chinh tâm ntŭk geh ntôn geh. Rơh tal pe, ntơm lơ 26/7 tât lôch năm 2026, rgum joi, uănh ndrel kuih tâm ăp ntŭk mhe geh saơ nau mbơh bah ƀon lan, tahen ơm mô lah ăp ntŭk kan n’gâng kan pă mbơh.

Nau ƀư kuih joi ân geh ƀư tĭng rjăp nkô̆ “Ntŭk nâp ri ƀư tât ntŭk nê, nơih ƀư lor, jêr ƀư ba kơi, njrăng ân nâp, ƀư ân rjăp”, đăp mpăn ngăn mpeh kon nŭih, ndơ dŏng, ntŭk ntu ƀư nau kan, rnă njrăng đăp mpăn ndrel đăp mpăn trong hăn. Ăp nar rlau aơ, Đội K53 hŏ ntơm ƀư nau n’gar lơi meng trong, tâm sŏng ma trong Trường Chinh, Phường Đắk Cấm. Bah năp nê, Đội K53 hŏ kuih ăp trong mêt uănh tâm êp ntŭk tâp khĭt tahen ta Phường Đắk Cấm, plôk pơk rlau 1000 m3 neh gay ma joi tay tâm du đê̆ ntŭk geh tât môch tahen, kơl an nau kan joi, rgum./.