Ăp nhih pah kan dơi kan n’gor Khánh Hòa dôl ra uănh tay gay rdâk njêng trong ntop kơl sa nar n’hanh gŭ rlu nar kon se ƀon lan rnoi mpôl đê̆ ta nkual mpeh bah dâng n’gor.

Tĭng Sở Giáo dục n’hanh Đào tạo n’gor Khánh Hòa, aƀaơ lam n’gor geh rlău 64.000 kon se rnoi mpôl đê̆, tâm nê gưl tiểu học rlău 28.000 oh. Êng nkual mpeh bah dâng n’gor (ntŭk Ninh Thuận ơm), geh rlău 60% rnoh kon se nti tiểu học lah nuĭh rnoi mpôl đê̆.

Wa Lê Thái Trường Thi, Groi Giám đốc Sở Giáo dục n’hanh Đào tạo n’gor Khánh Hòa an gĭt, ntơm nơh tă bah tơm geh ngân sách hôm đêt, n’gor Ninh Thuận ơm dơn ntop kơl du gâl dơm kơt phe an kon se nti gŭ sa nar n’hanh học bổng an kon se rnoi mpôl đê̆, tâm rnôk âk trong kơl mha êng ƀa ƀă mô hŏ dơi nkrum ăp tŏng. Lôch n’glăp nsum 2 n’gor ntơm bah nar 1/7/2025, nău an ƀư ăp trong kơl ăp kôp mô hŏ dơi an ƀư năn ngăch. Wa Lê Thái Trường Thi, mbơh lư:

“Nău an ƀư Nghị quyết tâm ban ŭch nsum mbra hôm âk nkô̆ nău geh tât đŏng yor hôm prăk dŏng, trong nchrăp. Yor geh tât ntĭm nti 2 tơ̆/nar, nai ntĭm, drăp ndơ, kơl pêt mât… âk ntil geh tât nău sa nar bah ăp kon se. Hôm dŭt âk jêr jŏt. Nkual Ninh Thuận ơm âk ntŭk nha mô hŏ ntĭm 2 tơ̆/nar ơm”.

Lôch nău lư bah VOV mpeh nău kon se nti nkual bah dâng Khánh Hòa mô hŏ dơi geh trong ntop kơl gŭ sa bán trú, UBND n’gor Khánh Hòa an gĭt hŏ jao Sở Giáo dục n’hanh Đào tạo ƀư tơm ra uănh tay lĕ rngôch trong kơl ntĭm nti đah bar n’gor ntơm nơh, bah nê nsŏng kơl rdâk njêng ăp nghị quyết mhe hao rblang dăn HĐND n’gor. Nkô̆ rgum tâm ăp trong ntop kơl kon se nti nkual jêr jŏt kơt học bổng an kon se rnoi mpôl đê̆, ntop kơl prăk nti, bôk nău kan dak toh hăn nti, ndrel ăp trong ntop kơl gŭ sa nar n’hanh rgâl geh ndơ kơt nti an kon se nti nkual rnoi mpôl đê̆. Nău rdâk njêng ăp nghị quyết mhe gay ntruch bah tâm ƀah trong kơl đah ăp nkual, đăp mpăn kon se nti ta n’gor Khánh Hòa lôch n’glăp nsum dơi tât geh ntŭk kơt nti n’hanh mât chăm siăn sa săk kah uĕh lơn.

Wa Nguyễn Thanh Hà, Groi kruanh UBND n’gor Khánh Hòa an gĭt, ăp nghị quyết nchrăp mbra dơi hao rblang dăn HĐND n’gor Khánh Hòa ta rơh hop tât, lôch nê an ƀư ăp kôp ta lam n’gor, lơn lah an kơl lor nkual rnoi mpôl đê̆ n’hanh nkual hôm âk jêr jŏt.

“Nău ntop kơl sa nar, gŭ nar an kon se nti rnoi mpôl đê̆ nsĭt tay nău dơi tam dŭt uĕh. Kơl an ăp kon se kơt nti mbro, ntop kơl an ăp kon se hăn nti, ntop kơl ăp rnăk hôm jêr jŏt. Bah nê kơl ăp kon se sa kah wah ngi, rgop hao jêng lam lĕ rngôch, đăp mpăn ngăch dăng n’hâm suan gay tĭng tay trong ŭch rŏng bah he”./.