Tâm ntŭk yôk prêh mpeh ba dâng n’gor Gia Lai, ntŭk geh âk nŭih rnoi mpôl đê̆ gŭ rêh, ăp nau kan hun hao văng sa, n’hao nau rêh ndrel ntuh kơl ntŭk ntu dơi geh cử tri uănh rjăp ngăn. Tâm ăp nar tâm mâp cử tri đah ăp nŭih kan ntoh măt Quốc hội, âk nau rgop đă lŏ kơl an âk lơn ân ntuh kơl tâm nkuăl jru, nkuăl ngai gay rgum hvêt nau tâm ƀah hun hao. Yuh Plai, tâm ƀon tơ Bla, xã Kon Chiêng ân lah, ndrel ma nau ntuh kơl ngih vâl gung trong, ân geh nau kơl an tuch tăm, pă kan pah nâp nâl ân kônh wa rgâl nau rêh:

            ‘Jêh geh djăt bôk nau kan bah ăp ntoh măt ri gâp saơ ăp nau kan hŏ geh tâm dăch ma nau ngăn, tâm dăch ma kônh wa kơt nau kan điện, trong, ngih săm ƀŭt, ngih dak si. Lah geh  dơi săch ƀư nau kan ri ŭch ăp đồng chí ân geh kơl an âk lơn đŏng tât xã Kon Chiêng ndrel ăp nkuăl jru, nkuăl ngai”.

Cử tri nkuăl jru bah n’gor Gia Lai kŏ mpŏng ăp ntoh măt jêh geh dơi săch lăp kan mra lŏ kơl an doh rklaih ăp nau jêr tâm hun hao văng sa, rêh jêng, ngăn lah kơl an kônh wa rgâl nau kan tuch tăm, n’hao nau geh dơi ndrel pă nau kan ân druh ndăm nkuăl rnoi mpôl đê̆. Cử tru Hlây, tâm ƀon Đă Yă, xã Mang Yang mbơh nau:

            ‘Ăp nŭih ŭch geh săch ƀư ntoh măt Quốc hội lah geh bu săch lăp ri lŏ kơl an âk lơn ân nau ndâk âk nau kan hun hao văng sa, jêh ri ndâk ăp ntrong ƀư nau kan gay ma njêng nau geh, pơk trong ân kônh wa hun hao ăng sa đah ăp nau ntĭm nti mbơh ăp nau kan tuch tăm mhe gay n’hao nau geh, hun hao văng sa”.

            Tâm nkuăl mpeh ba lơ n’gor Gia Lai, cử tri uănh khlay tât nau kan n’hoch  trong hoch dak lip ndrel nau nsôih gay hun hao bah n’gor tâm năm kan tât. Tâm xã Tuy Phước, cử tri Man Đức Thuận, mbơh, tâm nkuăl aơ geh uănh lah ntŭk tơm bah dak lip bah Gia Lai. Jêh rnôk phŭt dăng ngăn tâm dŭt năm e, nau rêh nŭih ƀon lah nar lơn geh nâp tay, yơn nau khuch ytât bah mih dak lip ăp năm hôm ơm. Cử tri Man Đức Thuận, mbơh nau:

            ‘Xã Tuy Phước tâm dŭt trong dak me Kôn ndrel dak me Hà Thanh, ăp năm ri geh dak lip băm jru ngăn. Tâm năm kan mhe, gâp ŭch ăp ntoh măt lah geh bu săchđă nau kan ri đă ma Quốc hội pă tơm prăk gay ƀư trong mpir ân geh n’hoch lơi dak lip, der nau khuch khat yor mih phŭt lơh đah kônh wa”.

            Kŏ gay hun hao văng sa êp mper dak lêng, cử tri Nguyễn Thanh Phương, khu phố 5, Phường Quy Nhơn Bắc ân lah, n’gor ân ân geh nau nsôih lah ăp nau kan văng sa mhe ndrel hun hao văng sa dak lêng tĭng nau jru, nau nâp nâl:

            ‘Gâp mĭn lah mô knŭng hun hao mhe nau dăng dơi nau blau njêng mhe ma ta aơ ân geh hun hao mpeh nau kan công nghiệp bán dẫn, chop gay mhâm ƀư ân geh hun hao dăng lơn. Tal bar lah hun hao văng sa dak lêng lah ngoai tâm ăp nau kan dăng dơi bah n’gor Gia Lai kŏ ân geh hun hao du trong ueh ngăn mô êng knŭng nhŭp lơh kan, mât rong ka ma ân geh hun hao ăp nau kan geh tât dak lêng đŏng”.

            Tâm rơh săch kan bah rnôk aơ, n’gor Gia Lai geh 28 nŭih ŭch geh săch gay sŏk 16 nŭih ƀư kan ntoh măt Quốc hội gưl XVI. Bah ăp rnôk tâm mâp cử tri bah năp nar ân geh săch, âk nŭih ƀon lan ntoh nau rnơm tâm nau kan bah ăp nŭih.  Wa Siu Trung, Groi Kruanh Uỷ ban MTTQ Việt Nam n’gor Gia Lai mbơh, cử tri ndŏ nau ŭch, ŭch ăp ntoh măt Quốc hội gưl XVI jêh rnôk geh dơi săch ƀư kan mra rgop âk lơn tâm nau ntrŭt dăng hun hao văng sa, rêh jêng ndrel n’hao nau rêh ƀon lan:

            ‘Bah nau kan tâm mâp, âk ngăn nŭih ƀon lan tâm ban nau kŏ kơt lah rnơm tâm ăp nau ton nê ndrel ŭch njoăl tât ăp nŭih jêh geh bu săch dơi, ƀư nau kan ntoh măt Quốc hội ri ân geh ƀư lĕ ăp nau nơm tă ton, tâm dăch, djăt nau ƀon lan kŏ kơt lah mbơh nau ma Quốc hội, Chính phủ gay ma rklaih ăp nau kan nau ŭch ma cử tri đă”.

            Lơ 15/3, ndrel ma cử  tri tâm lam dak, cử tri n’gor Gia Lai hŏ râng nar rgum lam ƀon lan hăn săch kan, săch luh ăp ntoh măt tŏng nau dơi, nau dăng ndrel nau kan, ntoh măt ân nau ngơi, nau mĭn ndrel nau ŭch bah ƀon lan tâm ntŭk kan Quốc hội. Aơ kŏ lah rnôk gay ƀon lan ntoh nau dơi ndrel nau kan bah công dân, rgop nau ndâk ntrong kan ƀon lan săch đă nar lơn ma nâp dăng, tŏng dơi nau ŭch hun hao bah neh dak ndrel bah n’gor tâm rnôk mhe./.