Săch kan-nar rgum bah nau ŭch nuih n’hâm ƀon lan, lah mâng veh ueh ngăn bah ƀon lan ƀư tơm, lah nau dăng gay ndâk du Ngih dak pháp quyền nâp nâl, du nau rêh tâm ban, ueh nâp. Aơ lah rnôk ma nau dơi ƀư tơm bah ƀon lan geh ntoh ueh ngăn, lah rjăp nau kan ngăn tâm ăp n’ha phiếu. Giáo sư, tiến sĩ Nguyễn Minh Đoan, giảng viên cao cấp ngih săm ƀŭt Đại học Luật Hà Nội lah rjăp: Bah nau săch kan, ƀon lan geh râng tâm ăp nau ntrŭnh geh tât nau kan khlay bah neh dak ndrel bah n’gor, tât râng nau kan mât ngih dak ndrel nau rêh jêng bah ăp ntŭk kan têh yor nơm săch luh:

            ‘Aơ lah ƀon lan ntoh nau dơi bah nơm bah nau săch luh nŭih geh nau blau, nau ueh dăng mô lah nơm kuăl lah ăp nŭih geh nau gĭt ngăn bah ăp gưl kan êng êng tâm nau rêh gay râng tâm ăp ntŭk kan tơm, ntŭk kan ntoh măt bah ƀon lan. Ndrel rnôk păng geh dơi ngăn tât nau jêng ri mô êng knŭng lah bah neh dak ma bah ƀon lan ri rnôk nê nŭih ƀon lan saơ nau hăn săch kan kơt lah du nar rgum yơn nkre bu kŏ saơ nau dơi săch kan nê lah nau ngăn”.

            Nau săch kan ntoh măt Quốc hội gưl  XVI ndrel ntoh măt HĐND năm kan 2026-2031 geh tâm rnôk neh dak lăp tâm rnôk hun hao tơm. Ê tă mâp geh Việt Nam dâh bah năp ăp nau dơi dăng kơt rnôk aơ: nau dăng ndrel nau rnơm lam ntur neh geh n’hao, nau mpŏng hun hao dăng, nâp nâl jêng nau nsôih kan mpeh nuih n’hâm rjăp, khoa học-công nghjệ, ntrơn rgâl mrô, văng sa ndrih, văng sa mrô pơk luh ăp ntŭk hun hao mhe, rgâl mhe nau mât kan neh dak geh ƀư kloh.

            Tâm rnôk nê, nau săch kan rơh aơ mô êng leo tât nau khlay ân năm kan 5 năm ma hôm lah nau săch ân tâm di trong hăn bah neh dak, ân nau nâp bah jâng văng sa mât neh dak, ân nau dơi ƀư ngăn hun hao tâm ăp năm ba kơi, tĭng tiến sĩ Nguyễn Viết Chức-Groi Kruanh uỷ ban Văn hoá, ntĭm nti, druh ndăm ndrel kon se bah Quốc hội, nau kan nê ân ŭch ăp nŭih ƀon lan ân gĭt kliogh lơn nau dăng dơi bah neh dak ndrel nau hun hao bah neh dak geh nsum ma nau kan săch bah nơm:

            ‘Nơm dôl lăp tâm rnôk du rach năm ân geh ƀư ngăn nau mpŏng bah rnoi mpôl, tât năm 2045 nơm jêng du dak hun hao. Păng ndŏ luh ăp nau đă prêh ngăn ndrel ŭch ăp ntoh măt Quốc hội ân geh nau dăng, nau dơi nâp nâl lơn, nsôih ƀư ngăn ăp nau kan ân ueh nâp lơn. Ndrel nŭih ƀon lan lơn ma ƀư nâp nau kan ndrel nau dăng bah nơm rnôk săch kan. ri ma nar rgum aơ lah nau khlay. Ăp cử tri ân ƀư ueh nau dơi bah nơm gay ma săch ndrel gĭt dơi lah aơ lah nau dơi yơn nkre lah nau kan đah nau hun hao bah neh dak”.

            Nau săch kan ntoh măt Quốc hội gưl 16 ndrel ntoh măt HĐND ăp gưl năm kan 2026-2031 lơn ma geh nau khlay rnôk geh tâm rnôk Đại hội ntoh măt lam dak tal 14 bah Đảng geh nau dơi, năl kloh nau rƀŏng, nkô̆ nau hun hao neh dak tâm rơh mhe ndrel săch luh rmôt nŭih kan gưl kan kloh geh nau nâp dăng mpeh chính trị, nau rêh jêng ueh kloh, nau mĭn rgâl mhe ndrel nau pŏng ƀư kan. wa Nguyễn Văn Phúc, Groi kruanh uỷ ban văng sa bah Quốc hội ân lah: nau dơi bah Đại hội mô êng lah nau nâp chính trị, ma hôm bư nâp nau rnơm bah ƀon lan tâm nau rđau kan bah Đảng, nau dơi ntrŭnh geh tât nau dăng dơi bah cách mạng Việt Nam:

            ‘Đại hội Đảng tal 14 mhe geh nau dơi ngăn hŏ pơk luh du rach năm hun hao mhe, rach năm hao săk bah rnoi mpôl Việt Nam. Ƀon lan, cử tri rnơm ngăn tâm nau rđau kan bah Đảng ndrel nau tâm Quốc hội lah ntŭk kan ntoh măt prêh ngăn bah ƀon lan, ntŭk kan dăng ngăn bah Ngih dak prêh ngăn. Cử tri săch tâm di, săch geh ăp nŭih ntoh măt geh nau râng tâm tâm nau kan bah Quốc hội gay ƀư ueh, geh nau tam, geh nau dơi pe n’gâng tơm khlay ngăn bah Quốc hội, bah nê rgop nau ƀư ueh nau kan yor Đại hội al 14 bah Đảng nchrăp luh”.

            Rnôk ƀon lan hăn săch kan tâm nau rnơm tâm trong kan hŏ geh Đại hội Đảng kơp dơn, ndrel rnôk ntrong kan n’gâng kan prêh ngăn bah ngih dak gay njêng luh nau dơi nê, ri nê lah n’hâm dăng, njêng nau nsôih têh gay neh dak nhoat hăn ngăn tâm rnôk hun hao mhe./.