Tâm ngih rƀŭn thôn 2, xã Phú Xuân, n’gor Dak Lak, âk nŭih ƀon lan ndrel Rnâng kan mât njrăng bah thôn ndal ƀư jêh ueh ân ntŭk săch nŭih kan mrô 10. Băng rôn, khẩu hiệu, n’ha cờ geh yông ueh thùng phiếu, nsưng mpan, điện dak, ngih ăch chrach kŏ geh đăp mpăn, kloh.  Wa Trần Văn Hùng, nŭih kan bah rmôt săch kan mrô 10 mbơh, lơ 15/3 tât aơ, 1.060 cử tri mra râng hăn nklăch phiếu ta aơ. Rnơm nau bonh đă ơm, ri ma ăp nau nchrăp, ndơ dong, nau kan mât đăp mpăn geh ƀư ân nar rgum bah cử tri:

 ‘Bah rnoh moh săk ăp cử tri geh lir tâm ngih rƀŭn thôn 2, ăp nar rlau aơ, phung hên hŏ nkoch trêng, ntĭm mbơh kônh wa joi uănh kloh ăp nŭih nơm săch. Tă bah nê gay săch nŭih geh nau blau, nau dơi ndrel nau nâp tâm nau kan gay săch lăp Quốc hội kŏ kơt lah HĐND ăp gưl”.

 Xã Phú Xuân geh ndâk ntơm nau rnglăp 3 xã Ea Púk, Ea Dăh ndrel Phú Xuân, tâm nkuăl Krông Năng ơm. Săch nŭih kan Quốc hội gưl XVI ndrel HĐND ăp gưl năm kan 2026-2031, xã geh nklăp 25 rbăn cử tri nklăch phiếu tâm 7 ntŭk săch, 19 ntŭk nklăch phiếu.  wa Phan Tiến Ấn, Groi Kruanh UBND xã, nŭih kan bah Uỷ ban săch kan xã mbơh, tât rnôk aơ, 19/19 ntuk hŏ nchrăp jêh ntŭk ntu, mât đăp mpăn, nau kan; rnoh moh săk bah ăp nŭih ân geh săch geh lir nâp ndrel mbơh tâm trong mạng, ăp rơh rƀŭn tâm mâp cử tri kŏ geh ƀư lôch, nchrăp ân nar rgum lam ƀon lan:

‘UBND xã Phú Xuân hŏ nchrăp nkra, mpla yông băng rôn, khẩu hiệu, thùng phiếu...tâm ăp ntŭk săch tĭng tâm di nau ntrŭnh bah Hội đông săch kan neh dak. Tât rnôk aơ, ăp nhoat nchrăp ân nau săch kan hŏ jêh nâp ueh. Nau kan nchih lir mohs ăk geh mbơh kloh tâm ăp ntŭk săch kan kŏ dôl geh ƀư ndrel nchrăp ân nar săch kan”.

Tâm M’Drak, ăp ntŭk kan tâm n’gor Dak Lak nklăp 90 km, nau nchrăp kŏ geh ndal đŏng.  Wa Nguyễn Đức Thảo, Kruanh UBND xã, Kruanh Uỷ ban sach kan bah xã mbơh, nau săch kan ntoh măt Quốc hội gưl XVI ndrel HĐND ăp gưl tâm xã kŏ geh nklăp 15.800 cử tri râng nau nklăch phiếu tâm 10 ntŭk bah 8 rmôt săch kan.Tât rnôk aơ, nau nchrăp kan hŏ jêh, mra ân nar săch kan. Wa Nguyễn Đức Thảo mbơh nau:

 ‘Rnôk aơ, phung hên hŏ nchih lir tŏng ăp rnoh moh săk ăp ntoh măt  ân geh săch tâm ăp ntŭk nklăch phiếu, ăp ntŭk geh âk nŭih ndrel n’ăp ma ntŭk kan bah UBND xã. Lôch ƀư rơh rƀŭn nchră tal 3 ndrel mbơh rnoh moh săk bah 40 ntoh măt ân geh săch kan sŏk luh 24 ntoh măt HĐND xã năm kan 2026-2031”.

Tĭng wa Cao Thị Hoà An, Uỷ viên Trung ương Đảng, Groi Bí thư Rnâng kan n’gor uỷ, Kruanh Uỷ ban săch kan n’gor Dak Lak, gay ƀư ueh nklăp 2,42 rkeh cử tri, n’gor hŏ ndâk 102 Uỷ ban săch kan Uỷ ban săch kan gưl xã, phường, pă 2.119 ntŭk nklăch phiếu. Tât rnôk aơ, 100% ntŭk nklăch phiếu hŏ ƀư jêh ăp ntŭk ntu, nau kan, đăp mpăn nâp nâl; ăp nhoat tâm nchră, lor moh săk ăp cử tri ndrel ntŭk ƀư nau tâm mâp cử tri gay ntoh măt mbơh nau kan geh ƀư tâm id nau ntrŭnh, nchrăp ân nar săch kan. Kruanh Uỷ ban săch kan n’gor Dak Lak đă ăp ntŭk kan, rmôt kan ndrel UBND ăp xã, phường, lŏ kơp uănh ân rjăp rnoh moh săk cử tri, đăp mpăn ăp công dân tŏng nau dơi kŏ geh ƀư nau kan bah nơm:

 ‘Ân geh nkah lah kơp uănh ân rjăp ăp rnoh moh săk bah ăp cử tri ân rjăp, đăp mpăn mô ƀư lơi du hê nŭih. Ngăn lah rmôt cử tri dôl pah kan tâm ăp ntŭk, ăp nkuăl công nghiệp, hăn pah kan ngai, rmôt cử tri lah kon se nti, sinh viên; kŏ kơt lah ăp nŭih ê geh pă căn cước công dân, ăp nŭih rơh bôk năp hăn nklăch phiếu. Ngăn lah, cử tri ji kuet, dôl săm tâm ăp ngih dak si kŏ ân geh kơp uănh, đăp mpăn nau dơi công dân dĭng lĕ kŏ geh râng  nau săch kan”.

 Đah nau nchrăp ân đăp mpăn, rjăp tă bah n’gor tât tâm dâng, 102 xã, phường tâm Dak Lak hŏ nchrăp ân nar săch nŭih pah kan. Ntơm nau kan ƀư jêh ntŭk ntu dŏng kan ân tât nau kơp uănh kloh ăp rnoh moh săk cử tri, dĭng lĕ nê kŏ rƀŏng tât nkô̆ nau mô ân nŭih geh lơi dơm nau geh dơi cônh dân. Lơ 15/3 tât, ndrel ma cử tri lam dak, rlau 2,42 rkeh cử tri Dak Lak mra ăp nhoat lăp tâm nar rgum têh bah neh dak./.