Dŭt mông kêng măng, rnôk kônh wa sĭt tă bah mir, ăp nŭih tâm Rnâng kan bah ƀon Ea Bông, phường Buôn Ma Thuột tâm pă jêng ăp rmôt hăn tât ăp rnăk gay ma nkoch trêng tât nar săch nŭih pah kan tâm lơ 15/3 tât. Nkô̆ nau mô êng lah mbơh mông, nar, ntŭk nklăch phiếu ma hôm mbơh kloh mpeh nau dơi, nau kan bah cử tri, nau dơi bah nŭih geh săch ndrel ăp nau tơm bah Luật săch nŭih pah kan. wa H’Chuyên Ênuôl, kruanh ƀon Ea Bông nkoch, nau ƀư aơ ueh tĭng nau rƀŭn rgum bah ƀon lan tâm ƀon nơm:

‘Yor kônh wa ta aơ âk ngăn lah bu ƀư mir, nơm hăn nkoch trêng ri tâm kêng măng, di rmôt nơm nkah pă jêng 5 mô lah 10 ngih hăn mbơh”.

Ndrel ma nau nkoch trêng sŏng, nau nkoch mbơh hôm geh ƀư tâm ăp nar rƀŭn rgum ndrel bah ăp rmôt ƀư nau tâm mâp bah ƀon. Gay đăp mpăn ăp nŭih geh gĭt nau kan, nau tâm nkoch trêng kŏ geh ntrơn ân tâm di. Wa Y Sil Ênuôl, nŭih bu rnơm tâm ƀon Ea Bông mbơh, nau kan nkoch trêng geh ƀư ma nau Yuăn ndrel Rđe gay tâm di ma ăp nŭih:

‘Nkoch trêng ân kônh wa đah nau ngơi yuăn ndrel nau ngơi me deh nơm. Yor lah nsum đah nau ngơi yuăn ri geh đŏng kônh wa bu mô lăng săng, rnôk ngơi ma nau me deh nơm ri kônh wa gĭt rbăng ndrel kŏ gĭt nau ŭch, nau mĭn gay ma săch geh nŭih tâm di nau dơi lơn”.

 Lah nai nti kon se tâm Phường Ea Kao, wa H’Pliêr Niê Kdăm nkoch, nau mbơh mpeh nar săch kan geh mbơh tâm ăp nar rƀun rgum rnôk rƀŭn chroh tâm nkuăl:

‘Kŏ geh ăp nau nkoch mbơh, tâm mâp cử tri tâm ăp thôn, ƀon. Tâm ngih rƀŭn ri cha xứ kŏ nkah đă nŭih ƀon lan nơm tât tâm nar nê ri ân geh hăn nklăch phiếu săch nŭih pah kan ân ăp tŏng”.

 Linh mục Nguyễn Minh Hảo, Qnŭih mât Giáo xứ Mẫu Tâm, giáo phận Buôn Mê Thuột ân lah, ăp nŭih nkre lah ƀon lan ndrel nau râng ƀư săch kan lah nau ƀư geh nau dơi ngăn đah neh dak.

 ‘Ăp ntil chroh kŏ lah công dân ndrel ndri ma nuih n’hâm nŭih ƀon lan rhơn ngăn rnôk geh du nau săch nŭih pah kan mhe. Gâp ŭch ngăn râng ƀư ăp nau kan bah du hê nŭih ƀon lan bah nơm. Nau dơi bah ƀon lan ri ân ƀư kloh, nê lah du nau ntĭm ntăn bah rmôt chroh rƀŭn”.

Tâm ăp xã n’har bri, yor ƀon lan nkhah ngai, nau nkoch trêng geh ƀư êng lơn. Tĭng yuh Lang Thị Son, Kruanh Uỷ ban Mặt trận Tổ quốc Việt Nam xã Ia Lốp, cán bộ mặt trận tâm rgop ma kruanh thôn, nŭih bu rnơm tât ăp ƀon lan, pă săm ƀŭt nkoch, ntĭm kônh wa uănh rnoh moh săk bah cử tri geh lir mbơh:

 ‘Xã Ia Lốp lah xã hvi, ƀon lan tâm ƀah srang ngai ri mô êng nkoch trêng tâm ăp rơh rƀŭn mô lah tâm trong mbơh ngơi tâm loa bah xã, ma hôm pă n’ha săm ƀŭt mbơh tât ăp rnăk đŏng. Tât rnôk aơ nŭih ƀon lan hŏ gĭt kloh nau mpeh nau săch kan êp tât’.

Lơ 15/3 tât, cử tri tâm lam dak mra râng nar săch kan ntoh măt Quốc hội gưl XVI ndrel ntoh măt HĐND ăp gưl, năm kan 2026-2031. Nau leo nau mbơh nkoch săch nŭih pah kan tât ăp ƀon, ăp ntŭk rƀŭn chroh tâm Dak Lak rgop nau đăp mpăn cử tri geh gĭt lĕ nau ntrŭnh bah pháp luật mpeh săch kan. Bah nê, ƀư ân tŏng ăp nau dơi ndrel nau kan bah ƀon lan tâm nau kan khlay bah neh dak./.