Ăp nar dăch Tết Nguyên đán Bính Ngọ 2026, ta n’gor Gia Lai mbro geh ăp nău kan mât kơl Tết an ăp rnăk dơi kơl, rnăk ach o, ƀon lan rnoi đê̆. Ta xã Ia Rbol, ntŭk geh klâp ma 93% rnoh nuĭh lah nuĭh Jarai, Phòng CSGT Công an n’gor Gia Lai lĕ tâm rgop đah UBND xã Ia Rbol ƀư bôk nău kan “Năm mhe n’gôr răm- Tết tâm rŏng”. Rnâng kan leo kan lĕ pă 200 nklâm ndơ Tết, ăp nklâm ndơ đah rnoh khlăy 500 rbăn prăk, tât ăp rnăk dơi kơl, rnăk ach o, rnăk geh nău rêh jêr jŏt. Wa Nay Pol, groi kruanh ntŭk kan văn hoá- rêh jêng xã Ia Rbol, n’gor Gia Lai an gĭt. “ăp tơ̆ tât Tết way ơm, xã Ia Rbol way geh mât kơl tât nău rêh bâh ƀon lan, đah nău ŭch ăp nuĭh an geh vơt Tết hơm răm đăp mpăn, ueh răm. Ta rơh Tết, n’gor lĕ geh rnoh kơl njoăl an xã gay ma ngăch tâm kơl, kơl an ƀon lan geh tay ndơ ma vơt Tết ueh răm lơn. Ta meng nĕ, ăp xã mât kơl tât ăp rnăk geh nuĭh kop ji, nuĭh quet nte  n’hanh ăp rnăk geh nău rêh jêr jŏt, gay ma mât đăp mpăn mô an geh ƀon lan mô geh ndơ sa, mô geh ndơ nsoh ta rơh Tết”.

Xă Đam Rông 4 n’gor Lâm Đồng dơi jêng tĭng nkô̆ nău nglăp nsum lĕ rngôch rnoh neh n’hanh rnoh nuĭh ƀon lan bah 3 xă: Đạ Tông, Đạ Long n’hanh Đưng K’Nớ. Xă geh rnoh neh bri têh hvi đah rlău 17.000 nuĭh; tâm nĕ dŭt âk lah ƀon lan rnoi mpôl đêt. Wa Lơ Mu Ha Poh-Bí thư Đảng ủy xă Đam Rông 4 an gĭt, ăp rnôk Tết tât yan puh sĭt, gưl ủy Đảng n’hanh N’gâng kan ƀon lan uănh mĭn nău rêh drăp ndơ n’hanh nuih n’hâm an kônh wa, ngăn lah ăp rnăk nuĭh rnoi mpôl đêt, rnăk ach o n’hanh ăp rnăk geh khuch trôk nar lơh. Ndrel đah tơm prăk ƀon lan, lĕ geh âk mpôl lŏng bôk tôr ntop kơl rlău 1.000 ñklâm ndơ kơl kônh wa rnoi mpôl đêt. "Tâm rơh Tết gay geh mông nar răm m’ak, rhơn an nuĭh ƀon lan ƀư âk nău kan văn hóa-njroh mprơ, nău pâl way ơm, ri nkret ƀănh chưng, pănh pháo nkao tâm măng 30 Tết. Nkre, rlău ma an ndơ tĭng nău kơl bah Đảng n’hanh ngih dak, ƀon lan hôm ntop kơl tay ndơ dŏng an ăp rnăka ch o, êp ach o, rnăk geh khuch khat hô bah rơh mih dak lip jŏ jong ta rơh dŭt năm mhe rlău gay ăp nuĭh ƀon lan dơi geh ndơ wơt Tết hơm răm.

Xã Đăk Tô (Quảng Ngãi)  geh njêng bâh ntơm nglăp nsum nkuăl têh Đăk Tô n’hanh ăp xã Tân Cảnh, Pôkô, Diên Bình. Năm 2025, nău wăng sa, rêh jêng bâh xã geh mât hun hao ngăch, âk nău mpŏng kan tơm lĕ dơi geh n’hanh rlău nău nchrăp kan. Ndrel đah nău mât kơl  nău rêh ndơ dŏng an ƀon lan, mât đăp mpăn an ăp nuiưh ƀon lan geh vơt tết da dê, ueh răm, xã Đăk Tô geh mât uănh leo ƀư ăp nău kan văn hoá, rhơn năm mhe geh âk nău ueh way ơm. Wa Mai Huy Hưng, groi kruanh UBND xã Đăk Tô an gĭt.“Mpeh nău văn hoá- rêh jêng rĭ mpôl hên way geh uănh khlăy, geh ăp nău kăn rhơn năm mhe gay ma ƀon lan ta ntuưk geh vơt Tết tâm ban kơt ăp nău kan nsum ta ntŭk rêh jêng bâh ƀon lan. Ngăn lah ăp năm rĭ xã geh ƀư bôk nău kan “bánh chưng ueh nđir”, pă prăk gay ma kơl n’hanh ƀon lan ƀư tĭng nklâm banh chưng gâm banh chưng nsum rhơn tâm nău vơt tết, ngăn lah pă banh an ăp rnăk ach o, dăch ach o”.

Ƀon Pi Nao, xă Nhân Cơ, n’gor Lâm Đồng lah ntŭk rgum tŏng ăp ntĭt mpơl văn hóa way ơm bah nsum mpôl rnoi nuĭh mpeh bah dâng Tây Nguyên, kơt Bunong, Mạ, K’Ho. Jay bah wa H’Yon, Bí thư Chi bộ ƀon Pi Nao, lah ntŭk kan bah Rmôt kan ndrel cheh tanh, nkre lah ngoăy tâm âk ntŭk ƀư văn hóa bah Nkual pâl nđaih nsum mpôl ta ƀon Pi Nao, ngăn lah rnôk Tết tât yan puh sĭt. "Nkual pâl nđaih nsum mpôl ta ƀon Pi Nao ntơm lăp dŏng, ta aơ mpôl hên geh râng njroh, mprơ, rdâk ƀư tay sa ba mhe n’hanh gâm ăp ntil ndơ sa way ơm. Đah lah kruanh rmôt kan ndrel, mpôl hên n’gôn ndrănh yăng, geh bri bri ih kro, ƀăng kro gay rhŏ an. Bah meng nĕ geh rmôt njroh mprơ, rmôt chĭng. Jay nta an ƀon dơi mât n’hanh ndrăy nău uĕh bah rnoi mpôl đêt nơm, nkre an ăp rơh druh ndăm ndrel râng gay saơ nău ŭch n’hanh mât nău uĕh bah rnoi mpôl nơm. Rnôk Tết lễ ri Đảng Ngih dak he rgŏ jă ăp nuĭh ƀon lan tâm ƀon ndrel ƀư sa Tết an ƀon lan kơt rnoi mpôl đêt oh nô bnuĭh Yău, gay ăp nuĭh geh rơh rgum rƀŭn, mâp măt. Jay geh ndơ rơ ƀư têh, jay mô geh ndơ ri ƀư jêt.

 Bâh bôk nău kan nkô̆ mpŏng ngih dak n'’huch ach o nâp nâl, bôk nnăukan jut jăng ngih rông mpông sat năm 2025, 10 rnăk ach o, jêr jŏt ta ƀon Groi 1, xã Đăk Đoa, n’gor Gia Lai geh ngih dak kơl ƀư ngih jay. Ăp ngih jay geh rnoh neh hvi ƀư jay 30m vuông let lơ, tĭng nău geh tâm rgop bâh rnăk vâl nơm, êng ngih dak kơl mô mplơ̆ tay lah 60 rkeh prăk/jay. Ta năp Tết Nguyên đán, 10 ngih jat ta ƀon Groi 1 lĕ geh ƀư lôch n’hanh pă jao an ăp rnăk geh dơn jay. Yuh Chon ndrel đah i sai n'’anh 2 hê kon lĕ lăp gŭ ta jay mhe di rơh Tết, mô mpôn nău rhơn.“Tết, rnăk vâl mô geh ƀư sa nkra têh, yơn lah geh jay mhe rĭ saơ rhơn lơn  ngăn…Bâh geh ngih dak kơl an du n’gul, rnăk geh tâm rgop tay du n’gul jêng lah mơ geh tay ngih jay mhe têh ueh kơt aơ. Geh ngih jay gŭ đăp mpăn geh tay nău nsrôih an hun hao wăng sa, dŭt năm geh kơp dơn rnăk vâl bah ach o. Tâm let năp tay, rnăk vâl rgŏ jă tay nsrôih pah kan jan sa, hun hao wăng sa rêh jêng mô an nău ach o plơ̆ tay. Dŭt lah ueh Đảng, Ngih dak’.

Thôn Đắk Giá 1, xă Dục Nông (Quảng Ngãi) aƀaơ geh 152 rnăk đah 612 nuĭh, tâm nĕ nuĭh Xơ Đăng geh dŭt âk. Tĭng wa A Thương, Kruanh thôn Đắk Giá 1, kônh wa du nuih n’hâm hun hao wăng sa, rgum nkra njêng, tât aƀaơ lam thôn knŭng hôm 9 rnăk ach o n’hanh 2 rnăk êp ach o. Năm bah năp, rnoh khlay ăp ntil ndơ lŏ mir âk ngăn kơt cà phê, cao su, bum đăp mpăn đŏng, rnoh geh âk, kơl nău rêh nuĭh ƀon lan nar lơ rgâl, muh măt thôn ƀon ntop rgâl hao. Wơt năm mhe tâm nău răm geh ndơ, geh khlay, wa A Thương njuăl nău ntĭnh tât kônh wa: " Tâm rơh Tết gâp rhơn an kônh wa, me, bơ̆, oh yuh ngăch dăng, sa Tết an ntêm nkrem, ndrănh bia ngêt đêt, dêr nău kop ji. Rnôk hăn trong an ndôp môp bảo hiểm gay mât đăp mpăn an nơm n’hanh ăp nuĭh kiău ma. Tĭng Nghị định 168 kônh wa nsrôih ƀư uĕh, ngăn lah tâm rơh Tết. Geh samƀŭt ƀĭt ndeh mơ dơi dŏng ndeh.

Thôn Liêng Hung, xã Đam Rông 2, n’gor Lâm Đồng geh rlău 282 rnăk ƀon lan rnăk đah rlău 950 nuiưh, dŭt âk lah ƀon lan K’Ho n’hanh Bunong. Wa Cil Ha Kròng rnoi K’Ho lah ngoăy tâm âk rnăk ƀon lan ntoh lư, nuĭh geh knơm ta thôn Liêng Hung, xã Đam Rông 2, n’gor Lâm Đồng. Bâh geh nănh rgâl mhe mir neh mô jêng, tăm cà phê tâm breh đah sầu riêng n’hanh du đê̆ ntil tơm sa play geh rnoh wăng sa play, năm mhe nơh, rnăk vâl wa Cil  Ha Kròng geh bơi tât 2 rmen prăk. “Bâh geh nău mât kơl bâh ăp rnăk n’gâng kan, ƀa ƀơ jur tât ta thôn ntĭm ƀon lan trong pah kan an geh săk rnglăy, jêng rnăk vâl gâp n’hanh ƀon lan tâm ƀon ăp nar lơ ma gĭt na nê̆ lơn mpeh nău kĩ thuật pah kan jan sa. an geh djăt tĭng Đảng, mô djăt bu mplư rlăm, gơih pah kan jan sa gay ma an ƀon lan đăp mpăn, nău rêh ăp nar lơ ma sâm geh lơn. Rnăk vâl gâp ndrel đah ƀon lan ƀư rơh vơt tết nsum gay ma mât ueh nău tâm rnglăp. Aơ lah rơh gay ma ăp nuĭh tâm mâp, nkoch nău pah kan jan sa tâm jan let năp tay, lah rnôk ma nău răm rhơn ntoh n'gôr ăp thôn ƀon"”

Ta xă Ia Dreh, bah năp Tết nguyên đán Bính Ngọ 2026, Ntŭk ƀư kan Druh ndăm rchong n’gor Gia Lai tâm rgop đah Mpôl druh ndăm xă n’hanh ăp nuĭh lŏng bôk tôr lĕ ƀư Bôk nău kan “Xuân yêu thương”, geh mông nar răm m’ak. Ta aơ, mpôl rdâk ƀư lĕ an bơi 500 nklâm ndơ geh phe, mì tôm n’hanh ăp ndơ dŏng an nuĭh ƀon lan ta ntŭk, an 20 nklâm prăk kơl hăn nti, 10 bôk ndeh wah jâng an ăp oh kon hŏk geh nău rêh jêr jŏt. Wa Ksor H’Un ta Ƀôn Nông Siu, xă Ia Dreh, n’gor Gia Lai saơ nău uănh kơl bah Đảng n’hanh Ngih dak ăp rnôk Tết tât.  "Ăp rnăk wâl nuĭh Jarai hôm e mâp jêr jŏt ta ntŭk dơi ngih dak uănh tât, ntop kơl ngăch. Rnôk dơi pă kho ao, rnôk geh ntop kơl phe gay đăp mpăn nău rêh. Ăp rnăk jêr jŏt đah jay gŭ dơi uănh ntop kơl ƀư jay. Đah ăp rnăk mô tŏng ndơ nkra njêng, Ngih dak ntop kơl ndrôk ntil gay mât rong deh kon, nkre ntop kơl du gâl prăk gay kơl kônh wa ntơm đăp mpăn nău rêh.

 Lôch geh kăch rek, mbo ba bêng đăm, 106 rnăk ƀon lan Bahnar ta ƀon Stơr, xã têh dăng Tơ Tung, n’gor Gia Lai ngăch ndăn nchrăp ăp yăng ndrănh ƀô kah gâm banh tek, rvăt kho ao mhe, banh, mứt, kẹo… gay ma rnăk vâl rhơn nsum tâm nar bôk năm mhe.  Yuh Đinh Thị Tranh, 27 năm deh, ta ƀon Stơr, nar tết rnăk vâl way geh yăng ndrănh gay ma ăp nuĭh gŭ rgum, tâm ngơi, tâm rgŏ jă pah kan rdâk njêng nău rêh hơm răm.“Rnăk gâp mô geh ơm ƀư têh kuăng, nar tết kanŭng jă bar pe nuĭh tât ta jay, ngêt sông. Nău khlăy ngăn lah nar tết oh nô, mpôl băl ndrel nsum rgum, tâm ngơi, ndrel ngêt sông du tơ̆. Mô geh ƀư âk hoach ir”.

Tâm mông nar Tết n’gŭr răm bah ƀon lan ăp rnoi mpôl đêt ta lam n’gor Dak Lak, kônh wa Êđê ta nkual mpeh bah lơ n’gor wơt Tết tĭng trong êng, hăn ndrel đah mir n’hanh nău way ơm jŏ năm. Jêh kăch rêk ba, Tết mô knŭng rơh rlu rlău ma hôm rnôk gay nsum mpôl ƀon lan rgum nsum, nkoch nău răm. Yuh Kpă H’Thảo, ƀon Lê Diêm, xă Sông Hinh, n’gor Dak Lak an gĭt: "Tâm rơh Tết, nuĭh Êđê ta Phú Yên way wơt Tết tĭng yan mir. Jêh rnôk kăch rek ba, kônh wa ƀư sa Tết, jă jrŏng rnoi n’hanh nuĭh ƀon lan tâm ƀon ndrel răm. Tĭng nău geh bah ăp rnăk, geh jay gŭch rpu, gŭch ndrôk gay wơt Tết, rnăk wâl mbơm oi ri ƀư têh lơn; hôm ăp rnăk jêr jŏt ri knŭng sa sŭr, djăr, yơn mông nar Tết hôm e răm m’ak, uĕh lăng.