Tâm dak lêng Vũng Rô, mông ôi ntơm đah măt nar bah ngai. Dak lêng n’gănh, sial khôm lhêt, leo n’ăp ma dak chiăt boh. Duk mêt uănh bah Đồn Biên phòng mpông ndrâm Vũng Rô hăn ƀư nau kan ơm. Đah cán bộ, tahen ta aơ, Tết mô geh tâm mâp ma rnăk vâl, ma lah ăp nar hăn mêt uănh tâm dek lêng mro, ăp nar mêt uănh geh n’ăp ma măng, gay ma nâp nâl tâm dak lêng, ndrâm kơh. Thượng uý Đỗ Đức Kiên, Kruanhr môt Trinh sát, Đồn Biên phòng mpông ndrâm Vũng Rô, Rnâng kan rđau tahen Biên phòng n’gor Dak Lak mbơh:

‘Cán bộ, tahen Đồn Biên phòng mpông ndrâm Vũng Rô mro uănh năl kloh nuih n’hâm nau kan, mro nchrăp ƀư nau kan ngăn gay ƀư nau kan bah nơm, ngăn lah nau mêt uănh nau tât tâm ntŭk, năn lơh, rdâng rklaih ăp nau ƀư tih tâm nau rnă njrăng chính trị, đăp mpăn nau rêh jêng. Đah gâp nơm lah năm tal 4 ƀư nau mât njrăng Tết ri gơih đŏng, rhơn, nkân nau nkah klâng ma rnăk vâl, nsôih mât rnă njrăng, đăp mpăn tâm nkuăl, yor du yan Tết ueh lăng, đăp mpăn ân ƀon lan’.

Tâm nklang dak lêng, ăp nŭih tahen grat ndrih hôm nsôih mêt uănh tâm ăp bôk duk, ăp ntŭk geh mpơl jê̆, mô ân geh lơi dơm du ntŭk ơm. Đah khân păng, mât nau đăp mpăn tâm nkuăl dak lêng mô êng lah nau kan ma hôm lah nau đă bah play nuih. Tahen Trương Huy Hoàng, Đồn Biên phòng mpông ndrâm Vũng Rô, ngơi:

‘Phung hên kŏ klâng ma rnăk vâl, yơn oh nô hên kŏ mơng hôm, knŭng tâm nkuăl nơm geh đăp mpăn, duk hăn kan ân nơih ueh ri nê lah nau rhơn bôk năm bah oh nô phung hên. Gâp ŭch rnăk vâl đăp mpăn, ueh lăng, geh âk n’hâm soan, nau rêh rsang hao nâp nâl”.

Ndrel ma nau kan mât nau ƀư tơm, ăp tahen Biên phòng hôm lah ntŭk nsing nâp bah nŭih joi nhŭp ka. Ntơm bah nau ntĭm ƀư săm ƀŭt, nkoch nau rdâng sŏk joi ka tih dôih, tât nau hăn kơl an nau khuch tâm dak lêng, rup gui tahen Biên phòng hŏ jêng nau mơng ngăn, tâm dăch đŏng. Wa Hà Thanh Hùng, tâm phường Phú Yên, n’gor Dak Lak, nkoch tât nau tâm boh đah nŭih joi nhŭp ka ndrel tahen grăt ndrih:

‘Đah ma ăp đòng chí biên phòng phung hên ri rhơn ngăn nŭih tă bah neh kơh kŏ kơt lah gôl dak, rnôk duk mpan phung hên geh nau tât khuch rmnah mô lah geh nau mô tŏng ri ăp oh nô tahen biên phòng kơl an âk ngăn. Đah ăp nar năm mhe ri oh nô tahen Biên phòng kơl an ân ăp nŭih hăn joi lơh ka, ăp nŭih tâm dăch ma dak lêng kơt gâp gơih n’ơr tâm kơl ndrel nkah đă ƀư ăp nau kan ueh, mô dơi ƀư tih ma nau ntrŭnh bah ngih dak”.

Ndrel ma luh nar tâm bôk dak lêng, yan năm mhe hŏ leo tât ăp ngih mhe tâm nkuăl tă geh dak lip tâm Dak Lak geh Tahen Biên phòng kơl an ndâk. Ăp nar tết, nau khuch răm tâm ăp ngih mhe jêh nkra lơn ma jêng nau ueh. Jêh ăp khay jêr jot yor rdâng ma dak lêng, ngih mhe mô êng lah ntŭk nkŭm mih, nar, ma hôm lah ntŭk gay ƀon lan ntơm tay nau rêh. Wa Trần Thế Lâm, thôn Hiệp Đồng, Xã Hoà Xuân, n’gor Dak Lak, nkoch:

‘Dŭt rhơn, lah ueh Đảng, Chính phủ, Ngih dak ndrel ăp nô tahen Biên phòng hŏ kơl an rnăk vâl hên ndâk ngih aơ. Mô mĭn lah nơm geh ngih kơt aơ tâm Tết năm aơ ơm, kơt aơ lah saơ rhơn ngăn”.

Tâm ăp nar năm mhe tât ma ăp ƀon tâm nkuăl dak lip Dak Lak, nau rhơn lơn ma geh ueh rnôk ma ăp rhiăng ngih mhe geh ndâk, rgâl ma ăp ngih rlâm jêh dak lip lơh. Nau kan Quang Trung hŏ kơl an ăp n’gor nkra 892 ngih ơm ndrel ndâk 606 ngih mhe, ntop tay nau rnơm gay ƀon lan đăp mpăn nau rêh, vơt du năm mhe duh răm lơn. Nkre hăn nsum ma kônh wa tâm nau nê, tahen Biên phòng n’gor Dak Lak lah rmôt tât tă bah ơm, rgop nau ƀư nâp đah nau kan ndrel nau rŏng. Mbơh nau aơ, Đại tá Đỗ Quang Thấm, Chính uỷ tahen Biên phòng n’gor Dak Lak, mbơh:

‘Phung hên uănh aơ mô êng lah nau kan bah năp măt, ma lah nau kan jŏ jong, nâp nâl, rjăp ndrel ƀon lan. Phung hên mra lŏ tâm rgop nsum ma n’gâng kan tâm n’gor gay ƀon lan ơm đăo mpăn ndâk tay nau kan tuch tăm, đăp mpăn nau rêh, tâm dăch ma ƀon tơm, ma nkuăl n’har bri, ndrel ma Tahen Biên phòng gay mât đăp mpăn nau ƀư tơm bah nkuăl neh, đăp mpăn n’har bri bah neh dak”.

Năm mhe dôl tât tâm ăp duk ntơm hăn tâm dak lêng bah bôk năm, tâm ăp ngih ơm mhe geh ndâk jêh dak lip ndrel ăp trong geh mêt uănh tâm mpeh tơm bôk bah neh dak. Ta ntŭk nkuăl n’har bri nê, năm mhe mô êng ntoh tâm nau kao mai, kao đào dang, ma hôm tâm nau rnơm geh bun dăp, tâm bar gơm đăp mpăn bah nŭih ƀon lan rnôk Tết tât, năm mhe sĭt.  Ndrel tă bah ăp nau nê, năm mhe ntŭk bôk trong rlong sial Dak Lak jêng dơi lơn, năm mhe bah nau kan, nau tâm boh tahen, ƀon lan, nâp nâl nau rnơm ntŭk bôk năp bah neh dak./.