Bôk nau kan “Nsum n’hâm mât dak lêng-tết tâm boh tahen ƀon lan’ geh tâm nau duh răm, tâm boh. Ăp nau njrog mprơ rnê dak lêng, gôl dak ƀon tơm, rup tahen dak lêng ƀư nau kan tâm ăp duk ƀư kan, đài, trạm ra-đa, ngih nkơng DK1...ndrel năm mhe neh dak hŏ lơi ân âk nau ueh, rgop nau tâm boh tahen ƀon lan ntŭk dak lêng, dôl dak, neh dak lêng mpeh ba dâng bah neh dak. Đại tá Phạm Ngọc Quý-Kruanh chính trị nkuăl 2 Hải quân mbơh:

            ‘Bôk nau kan “Nsum ty mât daklêng-Tết tâm boh tahen ƀon lan’ di rnôk tết năm mhe gay nkah ăp rnăk vâl ndrel nŭih geh kơl an bah nkuăl, rmôt kan, nkre kơl an ăp nklâm ndơ ân ăp tahen geh nau rêh jêr jŏt ngăn. Đah ăp kon bah nŭih joi ka ma rmôt kan ndơn mât bôk, bôk nau kan ŭch nkoch mbơh pă gay ăp kon se ndrel rnăk vâl vơt tết hơm tăm, đăp mpăn lơn. Bah nê, ƀư rjăp nau tâm boh tahen ƀon lan tâm nau ƀư nau kan năm 2026”.

            Tĭng Đại tá Đỗ Hồng Duyên, Groi Chính uỷ nkuăl 2 Hải quân: Bôk nau kan “Năm mhe nsum ty mât dak lêng-tết tâm boh tahen ƀon lan” lah rnôk gay cán bộ, tahen ndrel ƀon lan tâm pă nau rhơn vơt Tết, rêng nau tâm boh, mpoh nau duh răm uan năm mhe tâm bôk trong rlong sial. Bah nê rgop nau nkoch trêng, ntĭm mbơh nau ueh ơm Tết vay ơm bah rnoi mpôl, ndâk nuih n’hâm tâm kơl an tâm cán bộ, đoàn viên druh ndăm.

            Tâm pă mbơh nau rhơn tâm bôk nau kan, wa Bùi Thị Thu Hương-Groi Kruanh UBND xã Long Sơn, nkuăl ƀon têh Hồ Chí Minh, mbơh: ƀư nau kan n’gâng kan tâm nkuăl 2 gưl, tahen dak lêng mro tâm dăch ma ƀon lan tâm ăp nau kan:

            ‘Nkuăl mro tam dăch dơh ma phung hên đah Bôk nau kan tâm rgop tahen-ƀon lan, nŭih joi ka dak lêng, mât dak lêng. Nkuăl geh nau khlay kơl an tât kônh wa, mât chăm ân kônh wa ntơm bah nau đăp mpăn tâm dak lêng tât nau rêh nuih n’hâm kŏ kơt lah drăp ndơ”.

            Leo tât nau rhơn ân ăp rnăk vâl dơi kơl, bôk nau kan hôm ntop tay nau nsôih ân ăp oh kon se nti lah kon nŭih joi lơh ka geh nkuăl 2 Hải quân ndơn mât bôk. Oh Lê Triuệ Tuấn Việt, kon se nti ngih săm ƀŭt THCS Bình Châu 2, mbơh:

            ‘Gâp ndơn geh nklâm ndơ bah ăp kônh tahen ri gâp rhơn ngăn, ŭch ngăn. Gâp geh ăp kônh kơl an tâm rnôk hăn nti, năm mhe nơh gâp geh dơi nti blau. Jêh aơ têh gâp ŭch ƀư tahen dak lêng, yor gâp geh ăp kônh tahen ndơn mât bôk gay jêh aơ têh ri gâp kŏ rgop nau mât neh dak, đăp mpăn nau rêh”.

            Ndrel nsum nau nê, yuh Ngô Thị Quốc, rhơn nkoch:

            ‘Gâp dŭt n’hâm rhơn ngăn ndrel lah ueh ăp tahen hŏ kơl an âk lơn ndrel ndơn mât bôk kon gâp. Ăp rnôk Tết ăp năm, nkuăl 2 Hải quân kŏ bonh đă ndrel geh ăp nklâm ndơ rhơn tết ân ăp rnăk vâl, nau aơ ueh ngăn, kơl an rnăk vala gâp huch oi mbăk jâk tâm ngih. Gâp mô geh nau ma ƀư, dăn lah ueh aka ngăn tât tahen dak lêng, ŭcjh ăp wa, ăp kônh geh du năm mhe geh nau rhơn m’ak ndrel duh răm ndrel rnăk vâl”.

            Bôk nau kan ‘Năm mhe nsum ty mât dak lêng-tâm boh tahen ƀon lan” lah nau kan leo nau kơl an tâm nau rêh ueh jru, ntoh nuih n’hâm ‘Ngêt dak nkah gĭt tu” nau vay ơm “Tahen đah du nuih n’hâm kan’ bah nê lŏ lah rjăp nau kan, nau rŏng ndrel kon nŭih nhŭp joi ka, ăp nŭih dôl ăp măng nar tâm dăch ma dak lêng, mât dak lêng, ndrel ndrel ma then dak lêng ƀon lan Việt Nam mât nâp nkuăl dak lêng, gôl dak ueh khlay bah neh dak./.