Nkual “chrŏ dak bŭk” mpeh luh nar n’gor Dak Lak dôl tĭng kơn dâk hao tay kloh rnôk pah kan plơ̆ njêng tay lôch bah dak bŭk an ƀư ăp kôp, geh nău tam; ăp mblâm jay mhe têh uĕh mhe, nău rêh nuĭh ƀon lan đăp mpăn, nsing nơm n’hanh nuih n’hâm rdâk njêng nău rêh let năp tay rlay kah dăng. Rup cờ gŭr mănh êr lhêt lhơt mpăr ta ăp chor jay mhe mon njêng nuih n’hâm rhơn nđơr, wơt năm mhe Bính Ngọ 2026.

Mô ton ma mâp, ăp nar năm lĕ tết tât, rhơn Đảng, rhơn năm mhe, mpôl hên hăn tât thôn Phú Hữu, xã Hoà Thịnh, chrŏ dak bŭk mpeh luh nar n’gor Dak Lak di tâm nar rnăk wâl yuh Lê Thị Kim Ngân geh dŭt âk năch. Cán bộ Công an n’gor Đồng Nai, Ban nữ công Công an n’gor Dak Lak tât kơl an rnăk wâl jay tâm rŏng. Yuh Ngân dŭt rhơn yor nklâm ndơ mha êng tâm ăp nar mha êng:

“Dŭt rhơn ngăn, aƀaơ mô hôm blău lah ơm. Ăp kônh yơ tât khâl tết, dăn an ăp yuh nô năm mhe n’hâm suan ngăch dăng lăng uĕh n’hanh rhơn mƀak”.

Geh măt tâm nar jao an jay, wa Phương Văn Lành, Bí thư đảng uỷ xã Hoà Thịnh rhơn mbơh, têl dak bŭk lơh hŏ dơi bôr ndâp nkra bah. Hoà Thịnh dôl tâm rnôk rdâk tay dŭt geh nău mpŏng dơi.

”Nar aơ ăp yuh nô hăn tât ta aơ ri mô hôm geh têl rơh dak bŭk mô hŏ tă geh đŏng ôh, ma nău rêh bah kônh wa hŏ plơ̆ tay kơt ơm mhe. Nê lah nơm geh nău rđău đă bah ăp gưl uỷ đảng, nău kan nsum bah lam trong kan chính trị, nău nsum ti bah ăp nuĭh lŏng nuih n’hâm mơ dơi geh kơt nar aơ”.

Ngai đah jay yuh Ngân chuat rlău du dâng sre lah Đội 13 thôn Phú Phong, ntŭk geh dak bŭk dŭt hô, lah ntŭk Thủ tướng Phạm Minh Chính hŏ tât ôp uănh n’hanh rgŏ jă trong kan ndăng Quang Trung. Ntơm bah mbŭch hăch rlâm, nar aơ ta aơ hŏ geh jay ƀư tất niên ơm. Kơt wa Trần Văn Khánh, hŏ ƀư nar tất niên bah ơm. Tât aƀaơ, păng hŏ dơi nchrăp an Tết n’hanh lĕ ma nău rêh let năp tay đŏng.

Aƀaơ ri hăn mât chăm lŏ sre, phân buh, tôr lŏ sre, puh dak si, tăm njâm tay n’hanh nchrăp tơm si- kao si wơt tết đŏng, rdâk tay mir ba. Uănh nsum, rnăk geh âk nău kan ân ƀư ngăn.

Geh du nău dŭt uĕh, wa Trần Văn Khánh nha hôm way kuăl lah Trần Quốc Khánh đŏng. 4 kon ndăm bah păng ntơ săk lah Hoà, Hội, Nghĩa, Nam… tĭng bôk moh neh dak “Cộng Hoà-Xã Hội-Chủ nghĩa-Việt Nam”. 5 mblâm jay bah rnăk wâl 5 bơ̆ kon: Quốc Khánh- Cộng Hoà- Xã Hội Chủ Nghĩa- Việt Nam, dơi mon mhe bah trong kan ndăng Quang Trung, hŏ uĕh reh ntoh ta dâng sre nđĭr uĕh. Tĭng nô Trần Chủ Nghĩa, rơh têh uĕh mhe ntơm bah plơ̆ njêng trong kan têh ma Thủ tướng rgŏ jă, mô dơn nsĭt tay ntŭk gŭ mhe, gay kônh wa rdâk tay nău rêh, ma hôm mbluh soih nău mĭn.

“Bu ma rngot ri mô dơi ƀư du ntil ndơ, yor nău mĭn ân mbluh soih. Mô soih aih nău mĭn ri cheng nông dak saơ jâk đŏng. He rhơn mƀak, chrat ang, ri he ƀư moh ntil ndơ jăp uĕh da dê đŏng, saơ n’gơch n’hơu ma rhơn nđơr ngăn”.

Tâm ăp nar rhơn Đảng, rhơn năm mhe, nô Trần Chủ Nghĩa hôm mô ru ntrŭp tay chor ntưp bah năp jay gay ƀư ntŭk wơt năch, an ndeh đŏng. Nô Nghĩa ntrŭp tay 2 dĭng loih tâm 2 n’gâng mpêr gay ƀư jâng ndăl chŭt cờ. Nô an lah, nău chŭt cờ ta jay mhe ta nkual rdâk tay nkual dak bŭk dja, lah nău dŭt geh nkô̆ khlay:

“Ân chŭt 2 lha cờ ta 2 n’gâng mpêr nê an uĕh reh lơn. May saơ jay geh lha cờ ri păng mơ Ok di may lah? Ntop lah mpeh bah ri lah jay bơ̆ gâp. Năm aơ păng 45 năm Đảng, gâp hŏ rlău jât năm Đảng hôm đŏng”.

Tâm săk năm mhe Bính Ngọ khuh n’gôr rhơn Đảng, rhơn năm mhe, ăp lha cờ gŭr lhêt lhơt mpăr bah năp mpông mpêr jay mhe mô dơn mpơl gĭt lor du nar Tết ăp tŏng lơn, ma hôm lah nău lah rjăp an nđơr, rdâk njêng nău rêh let năp tay ta me neh tă ât rdâng đah dak bŭk.