Năm 2026, nău kan tăch n’gluh bah Việt Nam dâk ta năp nău ŭch geh mô dơn dâk hao tay lôch ăp rgoh n’gơ ntoch jong bah jâng wăng sa lam ntŭr neh, ma hôm tât ăp rnoh hun hao mhe geh nău nâp dăng n’hanh jŏ jong. Tĭng ăp nuĭh rnâng kan, nău kan tăch n’gluh ân ntik n’hao tay nău khlay kan n’gâng tơm, nkre rgâl dăng bah nău hun hao tĭng trong dĭ hvi jêng hun hao tĭng trong tâng jru, nsĭt geh nău dơi n’hanh jŏ jong, nkre đah nău n’hao rnoh khlay ntop hao tay, rnoh âk công nghệ n’hanh nău dơi ƀư tơm êng bah jâng wăng sa.

Bâh ntơm du dak rvăt ndơ dak bah dih dŭt âk, Việt Nam jêng dak tăch ndơ an dak bah dih dŭt âk đŏng; năm 2025 kơp dơn năm tal 10 tăch âk ndơ mbro an dak bah dih (kơp bâh năm 2016). Rnoh ntŭk tăch rgâl rvăt nglăp ndơ bâh dak bah dih geh prăk rlău 1 rmen đôlar lĕ hao ngăch, bâh 27 ntŭk tăch rgâl tâm năm 2013 hao tât 36 ntŭk tăch rgâl tâm năm 2025. Năm 2026 geh nău khlăy ngăn, năm bôk năp mbơh tơih nău nchrăp kan hun hao wăng sa- rêh jêng 5 năm 2026-2030, nău kan tăch ndơ an dak bah dih an geh n’hao nău kan lah nău nsrôih kan tơm khlăy, nkre lah rgâl dăng bâh hun hao tĭng nău têh hvi lơn, săk rnglăy n’hanh nâp nâl lơn, ndrel đah n’hao nău hun hao bâh rnoh khlăy hao, rnoh kan công nghệ n’hanh nău dơi ƀư tơm bâh n’gâng kan wăng sa. Wa Trần Thanh Hải- Groi kruanh ntŭk kan tăch rvăt ndơ bâh dak bah dih, N’gâng kan Công thương an lah, ta meng nău mbơh ƀư geh săk rnglăy ăp ntŭk tăch rgâl way ơm, Việt Nam an geh ƀư âk tay nău tăch rgâl tăch ndơ an dak bah dih, bah ir geh nău knơm âk ta du đê̆ ntŭk tăch rgâl tơm ta ntŭk. "Geh âk ăp nău tăch rgâl ta ntŭk tăch rgâl tăch ngluh ndơ an dak bah dih, aơ lah du nău ntrŭnh kan he an bah ir geh nău tât rnôk ma knơm âk ir ta âk ntŭk tăch rgâl đah dak bah dih mô lah ta ăp ntŭk tăch rvăt ndơ bâh dak bah dih.Rnôk ma lĕ geh  ntŭk tăch rgâl rĭ njoat hăn tay lah nău kan pah kan…Rgâl mhe nău kan mbơh nău tăch rgâl, tâm nĕ geh nău rgâl njêng nău ntơ n’hanh geh dŏng ăp trong kan kơt lah gĭt joi na nê̆ tu tơm ntŭk kan rĭ nĕ lah ăp trong kan kơl an nău ƀư tăch rgâl bâh he geh âk nău săk rnglăy an geh ueh lơn.."”

Tâm rnôk nău ta lam ntur neh hôm nha geh âk nău rgâl n’hanh nău tăch rgâl ta lam ntur neh ntơm lăp ta rơh rgâl mhe, tăch rvăt nglăp ndơ bâh dak bah dih geh nău kan dŭt khlay đah nău hun hao bâh Việt Nam, yơn lah nău kan geh mbơh ntrŭnh lĕ êng đah  ntơm nơh. TS. Cấn Văn Lực- Nuĭh way kan kruanh wăng sa BIDV, Nuĭh kan ndrel ta Hội đồng mbơh nău kan bâh Thủ tướng Chính phủ an lah, ntrôl dăng nău kan tăch ndơ an dak bah dih tâm let năp tay mô dơn rlu ta nău ŭch hun hao prăk tăch ndơ đah dak bah dih, ma an geh rgâl n’hao nău ŭch ueh hun hao, an geh nău tâm rgop đah nău kơl kan tăch rgâl, mbơh nău tăch ndơ an dak bah dih, hun hao Logistics, tơm prăk kơl an n’hanh ngăn lah n’hao nău dơi ueh mpơl nău kan n’hanh nău kan leo ƀư tĭng. "Mpôl he an geh n’hao nău dơi kan ta ntŭk, aƀaơ an geh ƀư tơm mpeh nău leo kan, nĕ lah an geh ƀư uănh nău kan khlăy, an geh ƀư jŏ jong lơ. Mpôl he an geh dŏng ueh lơn âk lơn ăp nău kan FTA, ntrôl an nău kan tăch ngluh an dak bah dih kơl kan, n’hao an săk rnglăy mbơh nău kan tăch rgâl, nău ntơ bâh ngih dak”.

Ntơm lăp ta rơh mhe, tăch ndơ an dak bah dih hôm nha lah nău nsrôih khlay ngăn bâh nău kan hun hao, yơn an geh ntrong kan hun hao nău kan an tâm di lơn n’hanh tâm di đah nău kan mhe. Tĭng Nghị quyết mbrô 01/NQ-CP lơ 8/1/2026 bâh Chính phủ, nău ŭch hun hao lĕ rnoh prăk  geh tăch ndơ an dak bah dih năm 2026 geh klâp ma 15-16% đah năm 2025, tâm ban đah geh prăk tăch ndơ an dak bah dih 546-550 rmen đôlar. Gay ma ƀư lôch nkô̆ mpŏng nău kan aơ, prăk geh tăch ndơ an dak bah dih râng geh ăp khay an geh klâp ma 45-46 rmen đôlar- du nău mpŏng kan geh uănh năl lah geh âk nău ntul rlong, an geh lăp kan tâm ban, nsrôih răng dăng bâh ăp n'gâng kan, ntŭk kan n'hanh ntŭk rêh jêng doanh nghiệp bâh ntơm ăp khay bôk năm mhe. Tĭng ăp nuĭh way kan, mpŏng tât  nău ŭch hun hao mhe an geh nău rgâl mhe bâh nău mĭn tât nău pah kan. Rnôk geh an ta nău kan ueh di, nđir kloh n'hanh rnoh mbrô, tăch ndơ an dak bah dih bâh Việt Nam mbra geh hun hao n'’hanh nâp nâl an geh ueh lơn.