Nau kan tăch ntŭn ndơ, nkra ndơ rlăm mô nâp hôm geh ơm. Ntơm lơ 15/12/2025 tât lơ 14/3/2026, lam ntŭk kan Hải quan lĕ saơ, nhŭp kân ndrel rklaih rlau 4.800 nau tăch ntŭng, rlăm nau kan tăch rgâl ndrel nchuăn rdeng tih dôih ndoh ndơ bah n’har bri, hao rlau 1000 tŏ, tâm ban ma bơi tât 26% rđil rơh aơ năm 2025. Tâm  dak, rmôt công an ndrel n’gâng kan kŏ saơ, rklaih mhal âk nau kan ê nkra, tăch ndoh ndơ rlăm, ndơ mô nâp.

            Êp ntrong kan Quốc hội, ăp ntoh măt rnê prêh nau nsôih leo lăp kan bah ăp n’gâng kan tâm nau lơh rdâng ma ndơ rlăm, ndơ mô nâp. Tĭng Trung tướng Phạm Công nguyên, Kruanh n’gâng kan Pháp chế ndrel rgâl mhe hành chính, tư pháp, N’gâng kan Công an-ntoh măt rmôt kan bah n’gor Thanh Hoá: Đah nau rđau kan bah Đảng, ăp ntŭk n’gâng kan hŏ ntrŭt dăng nau lơh rdâng ndơ rlăm, ndơ mô nâp lah ngoai tâm ăp nau kơl an bôk năp tâm rnôk aơ gay đăp mpăn ân hun hao văng sa rjăp, nap nâl ndrel đăp mpăn n’hâm soan ƀon lan:

            ‘Rnôk nơm lơh rdâng ngăn ma ndoh ndơ rlăm, ndơ mô nâp, tal bôk năp lah nơm ân geh mât nau geh dơi bah nŭih dŏng ndơ. Tal bar lah njêng luh ntŭk ntu nau kan ntuh rlong  ân nâp dăng ndrel tâm ban. Lah kơt ndoh ndơ rlăm hôm geh âk ngăn tâm ntŭk kan tăch rgâl geh nau khlay lah ntŭk tăch ndơ bah ăp nŭih ƀư nau kan ê nkra tơm geh khuch. Nau nê khuch tât nau kan hun hao bah ntŭk kan tăch rgâl, rnoh prăk geh ndrel khuch tât nau hun hao văng sa hun hao bar rnoh mrô. Lơh rdâng ma ndoh ndơ rlăm, ndơ mô nâp lah ngoai tâm ăp nau kơl an bôk năp rnôk aơ. Njêng luh ntŭk ntu ntul rlong ân tâm di đah ăp ntŭk kan ma hôm lah nau kan njrăng, mât n’hâm soan, n’huch prăk dŏng dak si”.

            Kruanh rmôt kan tăch rgâl jê̆ ndrel bah găp Việt Nam, wa Nguyễn Văn Thân rmôt kan bah nkuăl ƀon têh Hồ Chí Minh mbơh ndơ rlăm, ndơ mô nâp lơh jêng nau jâk ân ndơ ngăn, hao tât ăp ntŭk ƀư nau kan tơm, lơh khuch ân nau kan văng sa. Gay đăp mpăn hun hao văng sa bar rnoh mrô ndrel mât n’hâm soan bah nŭih ƀon lan, nau kan njrăng, rdâng tăch rlăm, tăch rgâl mô tâm di, nkra ndơ rlăm, mô nâp lŏ geh n’hao tay:

            ‘Ăp nŭih ƀư ngăn, prăk dŏng âk ri rnoh hao khlay. Ndri ma ndoh ndơ rlăm, mô nâp, huch thuk âk ntil ndoh ndơ ngăn. Ê nkoch ôh lah păng geh khuch ngăn tât n’hâm soan, nau rêh bah kon nŭih. Lah geh knŭng ndoew rlăm, ndơ mô nâp âk ri mhâm dơi geh n’hao nau dơi kơt nê? Dĭng lĕ bah nau rêh jêng ri geh âk nau khuch khat ngăn. Ndri ma nau kan njrăng, rdâng ndơ rlăm, ndơ mô nâp lah du nau kan ndal. Knŭng geh bar trong aơ lah nơm mêt uănh tâm ngih máy. Tal bar lah ân rgum rmôt ƀư kan tăch rgâl, rgum mêt uănh ăp ntŭk tăch ndoh ndơ. Hôm bah trong mạng ri ân geh nchră luh bah trong mât njrăng mạng”.

            Mra dơi saơ, nau lơh rdâng ma ndơ rlăm, ndơ mô nâp mô knŭng lah nau đă ndal gay mât nau geh dơi ân nŭih dŏng, ma hôm lah nau gay nsôih ndâk du ntŭk ƀư nau kan ân kloh rvah ndrel tâm ban. Rnôk ma ntŭk kan tăch rgâl geh “ƀư kloh”, ntŭk kan ngăn tơm mra geh tay nau nsôih gay hun hao, nau rnơm bah nŭih ƀon lan mra ƀư nâp, bah nê njêng nau dăng ân ntŭk kan hun hao văng sa nâp nala, rƀŏng tât nau n’hao hun hao bar rnoh mrô tâm rơh tât. Yơn lah, gay dơi geh nau aơ, êp nau leo lăp kan ngăn bah ăp rmôt kan n’gâng kan, ŭch ngăn nau nsum ty bah ntŭk kan tăch rgâl ndrel ăp nŭih rvăt dŏng ndơ tâm nau kan mô dơi ƀư ndơ rlăm, ndơ mô nâp, rgop nau ndâk njêng du ntŭk ƀư nau kan tăch rgâl ân ueh nâp ndrel hun hao jŏ jong./.