Tâm 235 rnăk ƀon lan aƀaơ dôl gŭ rêh ta nkual n’har, nkual ƀon lan gŭ đah xã Đăk Nên, nkuăl Kon Plông, n’gor Kon Tum n’hanh xã Trà Vinh, nkuăl Nam Trà My, n’gor Quảng Nam rĭ geh tât rlău 1 n’gul rnoh rnăk ach o. Yor geh kŏ văk ta nkual neh n’har, ƀon lan lĕ mô geh ntuh kơl ƀư ndơ dŏng ntung trong kơt điện, ngih nti, ngih dak si, mô geh pă săm ƀŭt dŏng neh...jêng lah geh roh âk nău dơi hun hao pah kan jan sa rgâl mhe nău rêh. Wa Phan Quốc Vũ, Kruanh rnâng kan mât uănh mât bri njrăng Thạch Nham, n’gor Kon Tum an gĭt, ntŭk kan dŭt ŭch pă neh bri mât njrăng an ƀon lan, ntŭk kan mât uănh, yơn yor bri lah bâh n’gor Kon Tum hôm nuĭh ƀon lan yor n’gor Quảng Nam mât uănh jêng mô dơi pă an mât bri. Yor nĕ, nuĭh ƀon lan, ntŭk rêh jêng rĭ mô dơi geh pă bri gay ma geh tay nău geh hôm nha mpôl kan mât bri geh mâp tay âk nău jêr jŏt ta trong mât uănh.

“Nău kan mât uănh bri ta nkual aơ dŭt jêr jŏt. Nău rêh pah kan rĭ aơ lah nkual ê hŏ geh điện mpoh ang tâm ban kơt ê hŏ geh sóng điện thoại n’hanh ăp ndơ dŏng khlăy êng ê hŏ đăp mpăn jêng lah dŭt jêr tâm nău rêh, nău gŭ âm dâm n’gui bâh mpôl kan mât bri. Ta nkual aơ lah n’har neh, nkual bri bâh n’gor Kon Tum mât uănh yơn nuĭh ƀon lan rĭ n’gor Quảng Nam. Ntŭk kan jêr ngăn lah nău mbơh tơih rgŏ jă ƀon lan mât uănh bri".

Aƀaơ, ndrel đah nău kŏ văk mpeh nkual neh, ƀon lan gŭ đah xã Đăk Nên, nkuăl Kon Plông, n’gor Kon Tum n’hanh xã Trà Vinh, nkuăl Nam Trà My, n’gor Quảng Nam, mô geh nău kan ndơ dŏng ntung trong geh ntuh kơl bâh rnoh prăk ngih dak. Nău aơ ƀư an nău rêh bâh nuĭh ƀon lan lĕ jêr lơ ma jêr lơn. Wa Y Thị, groi Bí thư rnâng kan nkuăl Ủy Kon Plông, n’gor Kon Tum an gĭt.

“Nău ŭch ntuh kơl doh rklaih nău jêr jŏt tâm nău rêh bâh nuĭh ƀon lan tâm ban kơt ntuh kơl ndơ dŏng ntung trong n’hanh ăp nău rêh jêng ta xã Trà Vinh, nkuăl Nam Trà My mô dơi doh rklaih yor pháp luật mô dơi an ƀư ntuh kơl bah dih nkual neh mât uănh. Lôch âk tơ̆ n’gâng kan 2 xã Đăk Nên -Trà Vinh n’hanh 2 nkuăl Kon Plông- Nam Trà My pah kan yơn lah nău kŏ văk mô dơi doh rklaih đŏng”.

Ta năp nău rêh jêr jŏt bâh 235 rnăk, bơi tât 1.100 nuĭh ƀon lan ta nkual kŏ văk, lĕ mbro 3 năm ba năp, âk rơh rƀŭn nchră đah n’gâng kan têh n’hanh n’gâng kan ăp gâl kan 2 n’gor Kon Tum n’hanh Quảng Nam lĕ geh ƀư yơn nău kŏ văk hôm nha mô hŏ dơi doh rklaih yor bar ding mô dơi geh nău tâm ban. Wa Đặng Quang Hà, kruanh UBND nkuăl Kon Plông, n’gor Kon Tum mbơh dăn.

 “Nău ŭch lah gâl kan geh nău dơi ơm doh rklaih, rjaih nău kŏ văk ta nkual neh lĕ geh kŏ khan bâh ntơm nơh. Bâh nĕ ăp ntŭk geh nău dơh nơih gay ma ntuh kơl mpeh ndơ dŏng ntung trong, mât kơl an nău rêh ƀon lan, mât đăp mpăn an nuĭh ƀon lan geh ăp nău dơh nơih mpeh neh ntu, mpeh ngih jay gŭ mpeh neh pah kan tuch tăm bâh nĕ ƀon lan geh nău rêh đăp mpăn, nău rêh ueh lơn".

Lôch tă geh rơh tâm mâp đah 2 ding, n’gor Quảng Nam hôm nha geh mât kơt ơm ŭch mât rnoh ƀon lan n’hanh rgâl nkual neh n’har Kon Tum jêng nkual neh nơm. Rlơ̆ tay n’gor Kon Tum an lah ŭch mât kơt ơm nkual neh n’hanh rgâl rnăk ƀon lan bơi tât 1.100 nuĭh bâh Quảng Nam ntrơn ta Kon Tum. Geh rnôk ta năm 2023,k 2 n’gor dơn ngoăy geh njêng 2 rmôt pah kan ƀư uănh nđôi lĕ rngôch ta nkual aơ, nkre lah pă phiếu sŏk nău tâm rgop bâh ƀon lan đah 2 trong kan “rgâl rnoh neh n’har pah kan n’hanh ntrơn ntŭk gŭ mât uănh ƀon lan”.

Nău geh tâm 2.240 nuĭh ƀon lan tât râng tâm rgop nău geh 882 nuĭh, geh rlău 37% nău đă rgâl ta nkual neh ntŭk pah kan hành chính đah 2 ntŭk. 1358 nuĭh, geh rlău 60% nău đă ntrơn ntŭk hộ tịch, hộ khẩu nuĭh ƀon lan xã Trà Vinh, nkuăl Nam Trà My dôl gŭ rêh tâm nkual kŏ khan mpeh n’har neh, ntŭk gŭ sĭt n’gor Kon Tum. Yơn lah tât aƀaơ nău geh rơh uănh nđôi đah 2 n’gor ê hŏ geh n’hao nău dơi ƀư ngăn. Kon Tum n’hanh Quảng Nam ê hŏ geh dơn ngoăy n’hanh nuĭh ƀon lan hôm nha gŭ rêh tâm âk nău pah pĭt mô tŏng, âk nău jêr jŏt.