Ntoh nau tâm nar rƀŭn, Kruanh Quốc hội Trần Thanh Mẫn mbơh, rơh rƀŭn tal 8 geh âk nkô̆ nau ngăn tâm ăp rơh năm kan Quốc hội gưl 15 tât rnôk aơ. Tĭng nê, Quốc hội mra uănh nkô̆, tâm nê geh 29 nkô̆ tâm nau kan ndâk pháp luật, 10 nkô̆ văng sa, rêh jêng, tơm prăk Ngih dak, mêt uănh, nŭih pah kan ndrel âk kan êng. Rơh rƀŭn tal 8 mra ƀư tâm lơ 21/10. Nchrăp nar pah kan lah 29 nar. Rơh rƀŭn pă jêng 2 rơh.

            Rơh rƀŭn geh ƀư bah năp rnôk rƀŭn du khay gay ăp ntŭk kan săch, uănh geh mông nar ƀư tâm di Luật ntrŭnh pháp luật; nkre gay tâm nchră, tâm ban mpeh nkô̆ nau Bôk rơh rƀŭn tal 8, ngăn lah ăp ntŭk kan rgop nau uănh nau ƀư, mông ƀư, nau nâp kan, nchrăp nkô̆ nau nchrăp luật, nau ntrŭnh gay ntop tâm Bôk rơh rƀŭn tal 8 tĭng nau rhuăt gleh.

            Tĭng Kruanh Quốc hội Trần Thanh Mẫn, rơh rlau aơ, nau kan tâm rgop đah Chính phủ ndrel ăp ntŭk kan Quốc hội nar lơn nâp, ueh, ngăn, săk tam ndrel săk ytam, ăp ntŭk kan ntoh n’hao nuih n’hâm kan, nchrăp bah ơm, bah ngai, pah kan măng, nar gay nchrăp ân luật, nau ntrŭnh mbơh Quốc hội:

           ‘Phŭt mrô 3 mhe rlau geh tât jêr, nau khuch ân ba kơi jâk. Ân tât rnôk aơ ê geh kơ lĕ nau khuch. Lam Đảng, lam ƀon lan, tahen nơm ntop tay nau jêr mhe. Chính phủ dâk bah năp nau jêr, jâk tâm nau rgum, dŏng tơm prăk, ƀư nau kan n’hao, đăp mpăn nâp nâl bah jâng văng sa, nkân nau hao khlay ndrel n’hao rnoh ăp ntil ndơ gay đăp mpăn nau rêh ân ƀon lan. Ndri ma, Đảng đoàn Quốc hội, Rnâng kan Đảng Chính phủ mra tâm rgop ƀư ngăn, năn, tâm di nau đă ngăn yor nau hun hao văng sa, rêh jêng, đăp mpăn nau rêh ƀon lan ndrel hun hao”.

            Jêh rnôk djăt nau nchră, mbơh bah ăp Kruanh n’gâng kan, ntŭk kan, rđau kan Hội đồng Dân tộc, ăp Uỷ ban bah Quốc hội, Thủ tướng Chính phủ Phạm Minh Chính rnê prêh nau tâm rgop bah Đảng đoàn Quốc hội ndrel Rnâng kan Đảng Chính phủ nar lơn ma ueh, mbơh, rơh rƀŭn gay kơp nau hôm kol, ân geh tâm ban gay ntrŭt n’hao nau nâp ân rơh rƀŭn. Ndri ma, Thủ tướng đă 2 ding ân geh nau tâm rgop tă bah nau săch, ntrŭnh. Thủ tướng đă ăp N’gâng kan, ntŭk kan nsôih, nchră, tâm rgop du trong rjăp ndrel tam đah Hội đồng dân tộc, ăp uỷ ban bah Quốc hội:

            ‘Êng nau ân geh ƀư jêng nau kan ngăn, trong kan, nau ntrŭnh bah Đảng gay nơm ƀư kan. Nơm ân geh rgâl mhe nau mĭn ndâk nkra pháp luật, ntơm bah nau knŭng rgum ân nau mât kan, tât nau nkre rgum ân nau mât nau kan săk tam, yơn lŏ ân geh rgop nau njêng trong hun hao. Gâp ân saơ geh rgâl mhe tâm nau nkra, kŏ kơt lah ăp ntŭk uănh năl. Tâm nê, ân geh rgum tu tơm. Rnôk aơ, nŭih pah kan bah nơm dôl hôm nkol. Nơm knŭng rgum tâm nau mât ân tam lah ueh hôm. Yơn lah, êp nê, ân geh pơk luh ntŭk mhe, njêng ân nau hun hao, gay rgum ăp nŭih lăp kơl an bah ƀon lan”.

            Thủ tướng ân lah, nsing tâm nau geh dơi bah ăp nau nchrăp luật gay dơi leo luh ăp nau ntrŭnh mhe, đah ăp nau kan hôm dôl geh tât, geh âk nau ƀư ri nơm ân geh rgum. Nau kan ndâk njêng pháp luật ân geh ƀư tâm nuih n’hâm, moh nau lĕ kloh, lĕ dơi, geh ƀư ngăn nê lah nau tâm di, ƀư ân geh săk tam ndrel âk nŭih tâm ban nau ri mra ƀư ân geh jêng luật ngăn. Hôm ăp nau kan ê kloh, ê ngăn, ê dơi, hôm âk nau tât, hôm âk nau jêr, mô dơi rdâng ri nơm ân geh rlong ƀư, nkre ƀư, nkre rhuăt luh nau blau, pơk hvi lơn.

            Lôch nar rƀŭn, Kruanh Quốc hội Trần Thanh Mẫn đă, ăp ntŭk nchrăp săch ân geh njoăl săm ƀŭt mbưh nau tât Quốc hội bah năp lơ 1/10, tâm nê ngăn ngên uănh khlay 6 nkô̆ nau tơm tâm du rơh rƀŭn ncră ân geh đăp mpăn nau nâp./.