Lah đảng viên mom rƀŭn tâm Chi bộ Thôn Đạ Nghịt 1, xã Lát, nkuăl Lạc Dương, n’gor Lâm Đồng, nô Cil Ha Sip, rnoi K’ho hŏ ngăch ntrŭnh mbơh nau rđau mrô 34 bah Rnâng kan n’gor uỷ Lâm Đồng, ƀư ueh nuih n’hâm kan, janh mĭn, janh ƀư yor nau geh nsum bah ƀon lan. Êp nau ƀư ueh nau kan geh jao tâm UBND Xã, nô Cil Ha Sip hôm tăm cà phê tĭng nau nâp ndrel bonh đă ƀon lan kơt ƀư. Rnôk aơ xã Lát hŏ dâk njêng geh ntŭk tâm boh tăm cà phê kloh, đah âk rnăk ƀon lan râng ƀư tĭng nau bu ŭch rvăt:

            ‘Jêh geh ntrŭnh ƀư nau ntrŭnh mrô 34 mpeh ăp nau ma đảng viên ân ƀư ndrel ăp nau ma đảng viên ân der ro gâp hŏ ƀư tĭng ngăn tâm nau rêh bah săk nơm. Loe trong gay nŭih tâm rnăk vâl ndrel ăp nŭih bu kơt tĭng ƀư”.

            Kŏ kơt Cil Ha Sip, ăp đảng viên bah chi bộ Thôn Păng Tiêng, xã Lát kŏ ndơn kloh nau leo trong bah đảng viên tâm nau ƀư nau rđau mrô 34 bah Rnâng kan n’gor uỷ Lâm Đồng. Tĭng wa Rơ Ông K’Thiên, Bí thư Chi bộ thôn Păng Tiêng, êng 4 nau der, geh: Der ƀư tih, nsĭt ân nơm, der tâm ntrôl kan, mô ŭch kan; der ƀư nau mô geh ngăn, mô nsĭt nau săk tam der joi êng trong, ƀư nau mô tâm di...ăp đảng viên tâm chi bộ kŏ ƀư ueh 3 nau ân geh ƀư, nê lah: Ngơi hăn ndrel ma kan, ƀư nau tâm di ma geh dơi nsum; ƀư lôch nau kan, nau nsôih prêh, rgâl nau mĭn mhe; ƀư leo nsĭt nau săk tam ngăn, nâp nâl ngăn. Wa Rơ Ông K’Thiên, ngơi:

            ‘Đảng uỷ xã hŏ ntrŭnh nau ntrŭnh mrô 34 bah N’gor uỷ tât đah ăp đảng viên ndrel ăp chi bộ thôn. Tă bah nê, Chi bộ Thôn hŏ ntrŭnh jru nau rđau aơ tâm ăp nar rƀŭn rgum chi bộ, kơp n’ăp ma tâm ăp nar rƀŭn dĭng lĕ bah thôn. Tă bah nê, ăp đảng viên ndrel ƀon lan tâm thôn kŏ ƀư kơt tĭng nkô̆ nau rđau đă ndrel ƀư tĭng, nau rêh ƀon lan geh rgâl âk, ƀon lan geh tâm rnglăp”.

            Xã Lát, nkuăl Lạc Dương geh rlau 70% ƀon lan lah rnoi mpôl đê̆ ngăn lah rêh nsing tâm nau kan tăm byăp kao, ndrel cà phê. Bol ma geh nau khuch bah jâng văng sa neh dak, yơn nau kan tuch tăm rêh jêng bah nkual hôm geh dơi mât hun hao. Tâm nê, nau geh du hê bôk nŭih geh bơi tât 50 rkeh/năm, hao 5 rkeh rđil bôk năm 2024, rnoh rnăk ach o jur huch hôm 2,6%, nau kan ndâk njêng ƀon lan mhe lŏ geh săk tam lơh, đah 17/19 nkô̆ nau hŏ dơi jêh...

            Tĭng wa Lơ Mu Ha John, Groi Bí thư đảng uỷ xã Lát, nkuăl Lạc Dương, n’gor Lâm Đồng, nau dơi geh aơ lah nau rgop khlay bah nau năn ntrŭnh ndrel rêng tam nau rđau mrô 34 lăp jru tâm đảng viên ndrel ăp kơn ƀon lan:

            ‘Nau ntrŭnh rmô 34 geh ƀư jru, âk ngăn cán bộ, đảng viên ndrel nŭih ƀon lan tâm ban nuih n’hâm, kơt tĭng ndrel tĭng leo n’hao nuih n’hâm ƀư ueh ăp nau dơi geh ƀư, der nau đă der. Bah nê, nŭih ƀon lan nar lơn ma rnơm tâm ăp nau ntrŭnh, ntrong kan bah Đảng ndrel Ngih dak”.

            Ndrel ma nau rđau rmô 34, Rnâng kan n’gor uỷ Lâm Đồng lŏ ntrŭnh nau mrô 21, lơ 25/10/2023 bah Rnâng kan rđau kan Trung ương Đảng ndrel ma nau ntrŭt dăng ntĭm nti, ƀư tĭng nau mĭn, nau kan, nau rêh Hồ Chí Minh ndrel nau kan leo trong bah cán bộ, đảng viên tâm nau ƀư rjăp nau mhal, nau ƀư nchâp bah Đảng, pháp luật bah Ngih dak, njêng nau nsôih mhe gay ntrŭt dăng nau rêh bah ăp ƀon lan lah êng, nau văng sa, rêh jêng nsum bah n’gor hun hao./.