Tâm ngih mhe ndâk, yuh Hiao, ƀon Bông Phul, xã Cư Á, nkuăl ƀon têh Pleiku mô dơi mpôn nau rhơn, yuh nkoch bah năp nơh, rnăk yuh gŭ ngih lĕ sat, yan mih ri rvê ngăn. Rnơm geh nau kơl an bah n’gâng kan ndrel prăk bah bôk nau kơl huch ach o, yuh hŏ geh ngih mhe gay đăp mpăn nau rêh ndrel nsôih rklaih luh ach o:

‘Ngih hên ach o ngăn, jêr ngăn. Ngih ri lĕ kra bah jŏ, lĕ sat, mih ri truh, bĭch mô dơi. Rnôk aơ geh bu kơl ƀư ngih mhe, ri gâp rhơn ngăn yor lah geh ngih gŭ hôm”.

Ndrel ma rnăk yuh Hiao, ntơm năm 2021 tât rnôk aơ, Đảng uỷ xã Cư Á hŏ geh rđau kan n’gâng kan ndrel ăp rmôt ndăn nau kơl an bah ăp bôk nau kan. Ăp nau kơl an tă bah tơm prăk huch ach o, tơm prăk “kơl an nŭih ach o” hŏ kơl ndâk ân 33 rnăk ach o ndrel pă 64 mlâm ndrôk me kơl an ăp rnăk ach o hun hao văng sa. Tât rnôk aơ, xã Chư Á hŏ geh 16 rnăk rklaih ach o ndrel 12 rnăk rklaih êp ach o, huch rnoh ach o bah xã hôm 39 rnăk (geh 1,58%). Wa Trương Văn Minh, Groi Bí thư Đảng uỷ, Kruanh UBND xã Chư Á, nkoch:

‘Rơh tât, Đảng bộ ndrel n’gâng kan rgum rđau ƀon kan ƀư rgum ăp tu tơm gay ƀư nau huch ach o ntơm rnôk aơ tât năm 2025. Ngăn lah, nau ntĭm nti kan ân nŭih tâm ƀon lan, ngăn lah nkuăl rnoi mpôl đê̆, kơl an ƀon lan geh nau kan đăp mpăn, rklaih ach o nâp nâl. Nsôih tât năm 2025, xã mra mô hôm geh rnăk ach o”.

 Ntơm năm 2021 tât rnôk aơ, nkuăl ƀon têh Pleiku kơl an ndâk ndrel nkra 64 ngih ach o, đah rnoh prăk rlau 3 rmen. Bơi tât 100 rnăk ach o ndrel êp ach o geh manh prăk gay hun hao văng sa, đah rnoh rlau 4,6 rmen. Rnôk aơ lam nkuăl ƀon têh hôm 149 rnăk ach o, tâm ban 0,24. Rnoh rnăk ach o rnoi mpôl đê̆ kŏ huch dăng, ntơm 2,94% tâm năm 2021 hôm 1,29%. Bư tĭng nau tă dơi, nkuăl ƀon têh Pleiku mra lŏ rđau ăp nkuăl, săch ăp nau kơl an ân tam, tâm di ma ăp nŭih. Wa Nguyễn Thị Thuý Diễm, Groi Bí thư Đảng uỷ, Kruanh UBND xã Diên Phú, nkuăl ƀon têh Pleiku, mbơh:

‘Phung hên lŏ ndâk nau nchrăp kơl an rnăk ach o rơh mhe 2025; n’hao nau geh ân ƀon lan, ƀư tĭng ăp nau tă dơi geh jut n’hach ach o rơh rlau aơ ndrel ƀư ueh lơn tâm rơh tât”.

Wa Nguyễn Thanh Bình, Groi Kruanh Uỷ ban MTTQ Việt Nam nkuăl ƀon têh Pleiku mbơh, rơh tât ndrel ma nau kơl an đảng bộ, n’gâng kan nkuăl ƀon têh Pleiku tâm nau ƀư kơl an rnoi mpôl đê̆ ndrel huch ach o nâp nâl:

 ‘Rơh tât, Uỷ ban MTTQ Việt Nam nkuăl ƀon têh ndrel ăp rmôt kan, ăp ntŭk kan mra lŏ tâm rgop, ntrŭt dăng nau nkoch trêng, bonh đă ƀon lan ƀư ueh ăp nau kan rgŏ jă ndrel nau kan tâm rlong rŏng dak geh nsum ma Bôk nau kan huch ach o nâp nâl, n’hao prêh nau rêh bah ƀon lan tâm ăp ƀon nkuăl rnoi mpôl đê̆”.

Ăp nau tă geh dơi tâm nau kan huch ach o nâp nâl tâm nkuăl ƀon têh Pleiku, n’gor Gia Lai ân saơ nau rđau kan ăp ntil, tâm dăch bah ntŭk kan đảng hŏ njêng nau kơl an ƀon lan, ngăn lah nkuăl rnoi mpôl đê̆, hao rklaih ach o, rƀŏng tât nau rêh đăp mpăn ndrel hun hao nâp nâl./.