Rđau nkô̆ nau rƀŭn, Groi Kruanh Quốc hội Nguyễn Thị Thanh lah rjăp, Uỷ ban Rnâng kan Quốc hội ntoh nau lah ueh jru ndrel nau rhơn ueh lăng ngăn tât ăp nŭih bah ơm, ndrel bơi tât 1,6 rkeh nŭih nai nti, cán bộ mât nau kan ntĭm nti tâm lam dak. Nkre đă ntoh măt Quốc hội uănh kơl an nau tâm nchră ăp nau ndŏ luh tâm Luật nai ntĭm nti.

Nkah tât nau ntrŭnh bah Luật mpeh nau săch nai ntĭm nti, wa Trần Văn Thức, rmôt kan bah n’gor Thanh Hoá mbơh, rnôk aơ săch nai ntĭm tâm ăp ngih săm ƀŭt dôl ƀư tĭng nau ntrŭnh nsum mpeh nau săch viên chức, aơ lah mô ueh dôl ƀư rmeh nai nti, mô dơi ƀư nau ntĭm nti môn nti gay ndâk Bôk nau kan ntĭm nti phổ thông năm 2018:

 ‘Gâp dŭt n’hâm tâm ban nau ndrel tâm di nuih ngăn đah nau nchrăp Luật jao nau dơi ƀư êng ân ntŭk kan ntĭm nti tâm nau săch, dŏng nai nti. Tĭng nê, N’gâng kan ntĭm nti, Bộ Lao động Thương binh ndrel Xã hội lah ntŭk kan tơm ndâk nau kan, bôk nau kan, nau nchrăp hun hao rnoh nai ntĭm nti tâm nau dơi mât, mbơh gưl geh nau kan ntrŭnh, rđau pă, biên chế ngih dak tâm ăp ngih săm ƀŭt ngih dak ndâk geh ntŭk kan geh nau dơi jao, ăp ntŭk mât nau ntĭm nti mô lah ntŭk ntĭm nti mât ƀư tâm nau săch nai ntĭm. Aơ lah nau ntrŭnh khlay mra dơi doh rklaih nkra tâm nau jêr, ngăn lah nar lơn ma jêr jâk mpeh nau rmeh, mô tŏng nai nti ntơm âk năm ma aơ tâm âk n’gor”.

Rgop nau mpeh nau ntrŭnh mât nai ntĭm, wa Nguyễn Văn Cảnh, rmôt kan bah n’gor Bình Định mbơh nau hôm kol bah du đê̆ nŭih me mbŏ kon se lơh nai ntĭm nti, kon se nti ƀư mô ueh tâm nai ntĭm lơh khuch tât nau ueh bah rup gui nai ntĭm nti, khuch tât nau kan ryơk nŭih ntĭm nti nơm. Nŭih ntoh măt đă:

‘Gâp đă Điều 11 ân geh ntop tay nau ntrŭnh ăp nau ma me mbŏ kon se mô dơi ƀư đah ăp nai ntĭm nti rnôk nai ntĭm nti ƀư rlau nau dơi bah nơm, me mbŏ kon se nŭih nti kŏ mô dơi geh rklaih nau kol ma nai ntĭm, ma ân geh nchră bah ngih săm ƀŭt, rmôt ntoh măt me mbŏ kon se, ntŭk kan ngih dak. Điều 9 ntrŭnh mpeh nau dơi bah nau nti, gâp đă rgâl nau dơi ndrel nau kan bah nai ntĭm. Đah du đê̆ nau kan bah nai nti ân geh ntop nkô̆ nau geh nau tâm rgop bah me mbŏ ndrel nŭih nti. Kơt lah, rnôk saơ nau dơi bah kon se nti, ri nai nti mô dơi ƀư ân jêng dơi bah nŭih nti ma ân geh tâm nchră ma me mbŏ”.

Mpeh nau kan prăk khay ndrel rnoh kơl an nai ntĭm nti, wa Dương Khắc Mai, rmôt kan bah n’gor Dak Nông ntoh nau tâm ban ngăn đah nau nchrăp ntrŭnh rnoh prăk khay ân nai ntĭm dăp prêh ngăn tâm ntrong kan rnoh prăk khay bah nau kan, gay doh rklaih nau jêr ndrel nau kan bah nai ntĭm nti. Wa đă dăp rgum ntrong prăk khay ân geh hăn nsum ma nâp nai ntĭm nti:

 ‘Tâm rơh rlau aơ, âk nai ntĭm nti geh nau blau, nau dơi rđau, nau rêh jêng ueh. Êp nê hôm ơm du đê̆ nai ntĭm kơp n’ăp ma cán bộ gưl mât nau kan geh nau tih mpeh nau rêh nau kan hŏ ƀư ân geh ăp nau mô ueh, geh nau rngot ân tât geh rklaih mhal. Gâp lah nau aơ yor lah nar aơ nơm ƀư luật hăn nsum ma nau ƀư nau kan ân pă prăk khay ri tâm rnôk ƀư mbơh dŏng luật ân geh ăp nau ntrŭnh gay n’hao nau nâp nâl bah rmôt nai ntĭm nti, ăp nhoat ndâk rmôt nai ntĭm nti ngăn ngên blau nau kan, tŏng dơi nau ueh mpeh nau rêh bah Nai nti ƀư nâp nau kan bah nơm”.

 Ntoh nau rgum djăt ăp nau mbơh nchră bah ăp ntoh măt Quốc hội, Kruanh n’gâng kan ntĭm nti Nguyễn Kim Sơn ntoh nau lah ueh đah ăp nau rgop mbơh bah ăp ntoh măt Quốc hội tâm nchră tât Luật nai ntĭm. N’gâng kan ân lah, đah nau mĭn kơl an, tâm ban prêh, tâm di nuih n’hâm prêh geh tâm nchră kơl an bah nau nchrăp Luật nai ntĭm nti, ma hôm lah nau ntoh nau kan đah n’gâng kan ntim nti ndrel đah neh dak./.