Măng 1/12, ta Bà Rịa-Vũng Tàu, Thủ tướng Phạm Minh Chính râng tâm trôm ăp nău ƀư mpeh pring xăng n’hanh điện sial ta dak lêng geh têh âk rmen đôlar bah Tập đoàn Pring xăng Việt Nam. Năm aơ, Tập đoàn Pring xăng Việt Nam (Petrovietnam) lĕ lôch jêh lĕ rngôch trong nchrăp năm đah nsĭt geh 1 rkeh rmen prăk, ndơ̆ an tơm prăk 164 rbăn rmen prăk. Petrovietnam lĕ mbơh ƀư ăp nău nchrăp ƀư khlay dŭt têh, công nghệ mhe kơt tâm trôm nău nchrăp ƀư khí-điện Lô B-Ô Môn n’hanh nău nchrăp ƀư Lạc Đà Vàng.

Ntoh ngơi ta tâm trôm nău ƀư, Thủ tướng Phạm Minh Chính mbah rhơn n’hanh djôt dơn nău nsrôih dŭt têh ndrel âk njoat hao mhe bah petrovietnam n’hanh Tổng công ty Cổ phần Dịch vụ kỹ thuật Dầu khí Việt Nam tâm nău mbơh ƀư ăp nău nchrăp ƀư pring xăng têh n’hanh ăp nău nchrăp ƀư ŭnh nar nkra njêng, tâm nĕ êng ăp nău nchrăp ƀư điện sial ta dak lêng geh dĭng lĕ khlay tâm ton nklăp 2 rmen đôlar. Thủ tướng mpŏng ŭch Tập đoàn n’hanh Tổng công ty rgâl hao têh dăng, đah ngăch hao jêng rlău 2 tơ̆ tâm ăp năm tât, geh nklăp 15-20% du năm; rgop ntrôl hao jêng GDP lam dak geh ngăch âk lơn, geh nklăp 8% tâm năm 2025.